काठमाडौँ । आज कम्युनिस्ट ध्रुविकरण सम्बन्धी बृहत अन्तरक्रिया कार्यक्रम हुँदैछ । क्रान्तिकारी पत्रकार संगठन नेपालको आयोजनामा काठमाडौँ अनामनगरस्थित संवाद डबलीमा ‘कम्युनिस्टहरुबीचको ध्रुविकरणः आवश्यकता र चुनौती’ विषयक अन्तरक्रिया कार्यक्रम सम्पन्न हुन लागेको हो ।
दिउँसो १२ः३० बाट सुरु हुने पूर्वसभामुख कृष्णबहादुर महरादेखि विभिन्न राजनीतिक पार्टीका वरिष्ठ नेताहरुको सहभागिता हुने भएको छ । कार्यक्रममा विप्लव नेतृत्वको नेपाल कम्युनिस्ट पार्टीको तर्फबाट सचिवालय सदस्य धर्मेन्द्र बास्तोला, एमाले स्थायी समिति सदस्य तथा पूर्वउपप्रधानमन्त्री टोपबहादुर रायमाझी, नेकपा क्रान्तिकारी माओवादीको स्थायी समिति सदस्य इन्द्रमोहन सिग्देललगायतका वक्ताहरुले कम्युनिस्टहरुबीचको ध्रुविकरणबारे आफ्ना धारणा राख्ने क्रान्तिकारी पत्रकार संगठनका महासचिव बाबुराम भुसालले जानकारी दिए ।