काठमाडौं । नेपाली काँग्रेसको जारी केन्द्रीय कार्यसमिति बैठक आज पनि बस्दै छ । प्रधानमन्त्री तथा पार्टी सभापति शेरबहादुर देउवाको निजी निवास बूढानीलकण्ठमा बैठक बिहीबारबाट सुरु भएको थियो ।
बैठक अहिले ११ बजे पुनः बस्ने काँग्रेसले जनाएको छ । हिजोको बैठकमा पार्टीको क्रियाशील सदस्यता सम्बन्धमा छलफल केन्द्रित भएको थियो । बैठकमा क्रियाशील सदस्यता छानविन समितिका संयोजक रमेश लेखकले समितिको प्रतिवेदनको व्याख्यासहित प्रस्तुत गरेका थिए ।
बिहीबारको बैठकमा सहमहामन्त्री डा प्रकाशशरण महत, केन्द्रीय सदस्यहरु आनन्दप्रसाद ढुङ्गाना, जीवन परियार, प्रदीप पौडेल, कल्याणकुमार गुरुङ र योगेन्द्र चौधरीले, मोहनबहादुर बस्नेत, हृदयराम थानी, कर्णबहादुर बुढा लगायतले आ–आफ्नो धारणा राखेका थिए ।
बैठकमा धारणा राखेका थिए । बैठकमा उपसभापति तथा अन्तर पार्टी समायोजन समितिका संयोजक विमलेन्द्र निधिले समितिको प्रतिवेदन प्रस्तुत गरेका थिए ।
महामन्त्री पूर्णबहादुर खड्काले प्रस्तुत गरेको निर्वाचन निर्देशिकामा पनि छलफल भएको थियो । काँग्रेस यसै बैठकबाट महाधिवेशनको सार्ने तयारीमा छ । नयाँ कार्यतालिका ल्याउने प्रवक्ता विश्वप्रकाश शर्माले बताएका छन् ।
