काठमाडौँ । नेकपा (एमाले)को विवाद सहमति नजिक पुगेको नेताहरुले बताएका छन् । शुक्रबार कार्यदलले सबै विवादलाई समाधान कसरी गर्ने भन्ने विभिन्न विकल्पमा छलफल गरेको थियो ।
अध्यक्ष केपी शर्मा ओली समूहबाट कार्यदलमा सहभागी नेता प्रदीप ज्ञवालीले भाषिक लगायतका केही परिर्माजन गरेर आज सहमतिलाई अन्तिम रुप दिने जानकारी दिए । कार्यदलले शुक्रबार झण्डै ७ घण्टा अर्थ मन्त्रालयमा छलफल गरेको थियो ।
बैठकपछि दुबै समूहका नेताहरुले सहमति नजिक पुगेको र अब अन्तिम रुप दिन मात्रै रहेको बताए । नेताहरुका अनुसार पार्टीलाई २ जेठ २०७५ मा फर्काउने र सर्वोच्च अदालतमा विचाराधीन मुद्दाबारे दुबै समूह सहमति नजिक पुगेको छ ।
बैठकपछि कार्यदलमा नेता माधव कुमार नेपाल समूहबाट सहभागी भएका नेता गोकर्ण विष्टले धेरै विषयमा सहमतिमा पुगेको एकाध विषय अझै टुंगिन बाँकी रहेको बताए ।
कार्यदलका अर्का सदस्य ज्ञवालीले पनि पार्टी एकतालाई सुदृढ गर्ने सन्दर्भमा आफूहरु लगभग सहमतिमा पुगेको बताए । सहमतिको दस्ताबेजलाई अन्तिम रुप दिन केही भाषिक परिमार्जन लगायतका केही विषयमा आज छलफल गर्ने बताए । उनले अहिलेका जति पनि प्रश्नहरु छन्, त्यसलाई सहमतिको विन्दुमा ल्याइपु¥याएको दाबी गरे ।
सहमति के के भन्नेबारे नेताहरुले खुलाएनन् । आज बस्ने भनिएकोले मुख्य विषयमा सहमति हुन बाँकी रहेको बताइएको छ ।
यसैबीच नेता माधव कुमार नेपालले नेपाली काँग्रेसका सभापति शेरबहादुर देउवालाई प्रधानमन्त्री नियुक्त गर्न गरिएको हस्ताक्षर फिर्ता नलिने बटमलाइन बनाएका छन् । सर्वोच्च अदालतमा विचाराधिन मुद्धालाई प्रभावित पार्न नहुने समेत नेता नेपालले बताए ।
विवाद मिलाउन कार्यदलका नेताहरु सिंहदरबारमा छलफल गरिरहेको बेला नेता नेपालले हस्ताक्षर फिर्ता हुन नसक्ने भन्दै ओलीले हस्ताक्षर फिर्ता लिने शर्त राखे सहमति हुन नसक्ने बताए ।
नेता नेपालले ओलीको असंवैधानिक कदमविरुद्ध मुद्धा अदालतमा पुगेको बताउँदै हस्ताक्षर फिर्ता पनि नहुने र अदालतलाई प्रभावित पार्न पनि नपाइने बताए ।
एमालेका केही नेताहरुका अनुसार ओली समूहले सर्वोच्चले प्रतिनिधिसभा विघटनविरुद्धको मुद्धाको फैसालालाई प्रभावित पार्न असार २८ गतेसम्म वार्ताको नाटक रचेको बताएका छन् । असार २८ सम्म वार्ता गरेर सहमति हुँदैछ भनेर अदालतलाई प्रभावित पार्न खोजेको नेपाल समूहका एक थरी नेताहरुले बताउँदै आएका छन् ।
