काठमाडौं । जनता समाजवादी पार्टी फुट्ने भएको छ । एकता केही समयपछि जसपाभित्र विवाद उत्पन्न भएको थियो । पछिल्लो पटक सरकार परिवर्तन र संसद विघटनको विषयमा प्रष्ट दुईधारमा विभाजित जसपा अब भने औपचारिक रुपमै विभाजन हुने भएको हो ।
जसपामा दुई अध्यक्ष बनाइएको थियो । एउटा समूहको नेतृत्व महन्थ ठाकुर र अर्को समूहको नेतृत्व उपेन्द्र यादवले गरेका छन् । यादव समूहले निर्वाचन आयोगमा आधिकारिकताको दाबी गर्दै निवेदन दिएका थिए । निर्वाचन आयोगले विवाद समाधानको लागि भन्दै आज दुबै पक्षलाई आयोगमा बोलाएको थियो ।
तर, दुबै पक्षसहित आयोगमा भएको छलफलमा सहमति भएन । योसँगै अब सजपा औपचारिक रुपमा विभाजन हुने भएको हो । अब आधिकारिकताको लागि दुबै पक्ष लाग्ने छन् । आयोगले सहमति नजुटे आधिकारिकता दिनु पर्नेछ ।
योगले बोलाएको बैठकमा उपेन्द्र यादवसँगै नेताहरु महेन्द्र राय, राजेन्द्र श्रेष्ठ, प्रकाश अधिकारी र मृगेन्द्र सिंह उपस्थित थिए भने अर्को पक्षबाट महन्थ ठाकुरसँगै नेताहरु राजेन्द्र महतो, शरद सिंह भण्डारी, अनिल झा, लक्ष्मणलाल कर्ण, केशव झा र सुरेन्द्र झा उपस्थित भएका थिए ।
बैठकमा अध्यक्ष यादवले पार्टीमा छुट्टाछुट्टै गतिविधि भएको र सँगै बस्न सक्ने अवस्था नभएको बताए । अर्का अध्यक्ष ठाकुरले भने उपेन्द्र यादवको पार्टी फुटको अवस्थामा पुगेको बेला एकता गरेर आफूहरुले जोगाइदिएको, तर अहिले बिर्सिएको गुनासो गरे । मागमुद्दा छाडेको र अग्रगमन भन्दै प्रतिगमनतिर लागेको भन्दै ठाकुरले यादव समूह सच्चिएर आए सँगै हिड्न सकिने बताए ।
ठाकुरको भनाईको जवाफ दिँदै यादव समूहले सँगै बस्ने अवस्था नभएकाले आधिकारिकताबारे निर्णय गरिदिन आयोगसँग आग्रह गरेका थिए । योसँगै अब जसपाको ऐनअनुसार पार्टीको आधिकारिकताबारे निर्णय गर्ने प्रक्रिया अगाडि बढाउने निर्णय भएको छ ।
