काठमाडौँ । प्रधानमन्त्री केपी शर्मा ओलीले आज दिउँसो सपथ लिँदैछन । विपक्षी गठबन्धनले वैकल्पिक सरकारको लागि बहुमत पुर्याउन नसक्दा ओली पुनः प्रधानमन्त्रीमा नियुक्त भएका हुन् ।
नयाँ सरकार गठनको लागि राष्ट्रपति विद्यादेवी भण्डारीले दिएको समयसीमा भित्र बहुमत जुटाउन नसक्दा विहीबार राति १० बजे ओलीलाई ठूलो दलको हैसियतमा पुनः नियुक्त गरेकी हुन् । राति ९ बजेसम्म नयाँ सरकार गठनको लागि समय दिइएको थियो । बैशाख २७ गते संसदमा अविश्वास मत लिन असफल भएपछि ओली पदमुक्त भएका थिए ।
समयसीमा भित्र विपक्षीले बहुमत पुर्याएर दाबी पेश गर्न नसकेपछि राष्ट्रपति भण्डारीले संविधानको धारा ७६(३) अनुसार प्रधानमन्त्री नियुक्त गरेकी हुन् । अब प्रधानमन्त्री ओलीले एक महिनाभित्र फेरि संसदबाट विश्वासको मत लिनुपर्ने हुन्छ ।
त्यसबेला उनले विश्वासको मत पाएनन् भने धारा ७६ (५) अनुसार राष्ट्रपतिले अर्को व्यक्तिलाई प्रधानमन्त्री बनाउनुपर्ने हुन्छ । र, उसले पनि एक महिनामा विश्वासको मत पाउन नसके प्रधानमन्त्रीले संसद विघटन गरी मध्यावधि चुनाव घोषणा गर्न पाउँछन् । यो हेर्दा अब देश मध्यावधि चुनामा गएको विश्लेषण हुन थालेको ।
प्रधानमन्त्री ओलीले एमालेभित्रको आन्तरिक विवाद मिलाउन नेपाल समूहका नेतााहरुलाई पनि मन्त्रिपरिषदमा लैजाने छलफल थालेका छन् । पहिलो दिनमा नेपाल समूह सहभागी भए देशभर राम्रो सन्देश जाने भन्दै ओलीले आजै एक दुई जनालाई मन्त्रीमा नियुक्त गर्ने गरी छलफल गरेका छन् । तर, नेपाल समूहले पहिले आफूले राखेको शर्त पूरा गर्नुपर्ने अडान लिएको छ ।
हिजो दिउँसो ओली र नेता नेपालबीच झण्डै चार घण्टा चलेको वार्ता सकारात्मक भएपछि सामुहिक राजिनामा आएन । भेटपछि नेता नेपालले आफूहरुको राजिनामा चार दिनलाई टरेको प्रतिक्रिया दिए ।
ओलीलाई सहयोग गर्दै आएको जनता समाजवादी पार्टीको महन्थ ठाकुर समूह तटस्थ नबसेर विपक्षी गठबन्धनलाई साथ दिएको भए काँग्रेस सभापति शेरबहादुर देउवा प्रधानमन्त्री हुने बाटो खुल्थ्यो । तर, देउवालाई न ठाकुर समूहले समर्थन गर्यो न नेपाल समूहले राजिनामा दियो । यी दुई समूह ओलीलाई पुनः निरन्तरता दिने वा नयाँ सरकार गठन गर्ने भन्नेमा निर्णय भएका थिए ।
