काठमाडौं । प्रधानमन्त्री केपी शर्मा ओलीले मन्त्रिपरिषदको आकस्मिक बैठक बोलाएका छन् । एक मन्त्रीका अनुसार शनिबार साँझ ५ बजे प्रधानमन्त्री निवास बालुवाटारमा बोलाइएको छ ।
बैठकको एजेण्डाबारे पूर्वजानकारी नगराइएको बताइएको छ । नियमित बैठक नभएकोले बैठकका एजेण्डाबारे मन्त्रीहरु अनविज्ञ छन् । मन्त्रिपरिषदको नियमित बैठक सोमबार र बिहीबार बस्ने गरेको छ ।
कोरोना महामारी रोकथामबारे अहिलेसम्म भएका काम, निषेधाज्ञा र बाँकी लिनुपर्ने निर्णय, बैशाख २७ गतेको प्रधानमन्त्रीको विश्वास मत लिने प्रस्तावबारे छलफल हुन सक्ने अनुमान गरिएको छ ।
त्यसैगरी संवैधानिक परिषद् बैठकबारे पनि छलफल हुने बताइएको छ । प्रधानमन्त्रीले भोलि बोलाएको संवैधानिक परिषदको बैठकमा प्रमुख प्रतिपक्षी नेपाली काँग्रेसका सभापति शेरबहादुर देउवा सहभागि नहुने घोषणा गरिसकेका छन् भने सभामुख अग्नी सापकोटा पनि सहभागी नहुने बताइएको छ ।
