काठमाडौँ । नेकपा (माओवादी केन्द्र) ले प्रधानमन्त्री केपी शर्मा ओली संविधान र परम्परालाई मिच्दै अगाडि बढेको भन्दै समर्थन फिर्ता लिएको छ । समर्थन फिर्ता लिएको पत्र बुधबार संसद सचिवालयमा बुझाएको छ ।
माओवादी केन्द्रले ओली नेतृत्वको सरकारको निरन्तरता भए राष्ट्रियता, लोकतन्त्र र जनजीविकाका सबै मुद्दाहरुमा गम्भीर ख तरा पैदा भएर कालान्तरमा राष्ट्रिय स्वाधीनताकै मुद्दा नै गम्भीर ख तरामा पर्न सक्ने भन्दै समर्थन फिर्ता लिएको बताएको छ । उसले कोरोना नियन्त्रणमा ओली सरकार असफल भएको समेत माओवादी केन्द्रले आरोप लगाएको छ ।
त्यसैगरी राष्ट्रियताको मुद्धालाई सौदाबजीको विषय बनाएर देशलाई बाह्य शक्तिको क्रिडास्थल बनाउँदै लगिरहेको पनि माओवादी केन्द्रले पत्रमा उल्लेख गरेको छ । पत्रमा प्रधानमन्त्री ओलीले विश्वासको मत लिनुपर्ने बेला नलिएको र वैशाख २७ गते संसदको नियमित अधिवेशन बोलाउनुपर्ने बेलामा विश्वासको मत लिनका लागि बैठक बोलाएको भन्दै माओवादीले आक्रोश पोखेको छ । संविधान र परम्परा मिच्दै ओलीले २७ गते बैठक बोलाएको माओवादीको ठहर छ ।
सरकारलाई दिएको समर्थन फिर्ता लिने निर्णय माओवादी केन्द्रले मंगलबार गरेको थियो । सोही निर्णयअुनसारको पत्र संसदीय दलका प्रमुख सचेतक देवप्रसाद गुरुङले संसद सचिवालयमा बुझाएका थिए ।
प्रधानमन्त्री ओलीले यही बैशाख २७ गते संसदको विशेष अधिवेशनबाट विश्वासको मत लिँदैछन् । तत्काल कायम रहेको सदस्य संख्याको बहुमत नपुगे ओली सरकार ढल्न सक्नेछ ।
