काठमाडौँ । धरहराको आज उद्घाटन गरिँदैछ । टावर निर्माणको काम सकिएपनि वगैंचा, संग्राहालयलगायतका काम बाँकी हुँदै उद्घाटन गर्न लागिएको हो । धरहराको उद्घाटन भएपनि निर्माणका अन्य काम बाँकी रहेकोले चढ्न वा अवलोकनको लागि तत्काल खुला नहुने भएको छ ।
प्रधानमन्त्री केपी शर्मा ओलीले आज नयाँ धरहराको उट्घाटन गर्न लागेको राष्ट्रिय पुनर्निर्माण प्राधिकरणले जनाएको छ । ६ वर्षअघि भूकम्पले ढालेको धरहरा बैशाख गतेको एक पहिले मात्रै उद्घाटन गर्न लागिएको हो ।
नयाँ धरहरा क्षेत्र ४२ रोपनी क्षेत्रफलमा फैलिने छ । धरहराको टावर नजिकै चार तले भूकम्प र टक्सारसम्बन्धी सङ्ग्रहालय बनाउने काम भइरहेको छ । यस्तै धरहरा क्षेत्रमा विश्रामस्थलसहितको अत्यन्तै मनमोहक बगैँचा तथा सङ्गीतमय फोहरासमेत बन्नेछ । धरहराको निर्माण सकिए पनि त्यस क्षेत्रमा निर्माण हुने अन्य संरचनाको काम भइरहेको प्राधिकरणले जनाएको छ ।
प्राधिकरणका विज्ञ इञ्जिनियर राजुमान मानन्धरका अनुसार आउँदो मंसिरसम्म सबै काम सकेपछि मात्रै सबैका लागि धरहरा खुला हुने भएको छ ।
धरहरा बाहिरबाट हेर्दा ११ तलाको देखिए पनि भित्र जमिनमुनि दुई तलाको भूमिगत संरचना रहने छ । जमिनमाथि भुइँतलासहित २३ तला हुनेछ । जमिनमाथिबाट गजुरसहित धरहराको उचाइ ८३ दशमलव ८५ मिटर छ । धरहराभित्र दुई लिफ्ट राखिएको छ । लिफ्टमा एक पटकमा १० जनाले यात्रा गर्न सक्ने बताइएको छ ।
लिफ्टका कारण वृद्धवृद्धा तथा अपाङ्गता भएकालाई धरहरा चढ्न सहज हुनेछ । धरहरामा फलामको भ¥याङसमेत जडान गरिएको छ । धरहराबाट उपत्यकाको दृश्यावलोकनका लागि २० औं तला बाहिर २ दशमलव ५ मिटर चौडाइको बार्दलीसमेत बनाइएको छ । २२ औं तलामा पुरानो धरहराबाट झिकेर सुरक्षित राखिएको शिवलिङ्ग स्थापना गरिएको छ ।
