News Portal

  • आजको मौसमः तराईमा भारतबाट आएको घातक तुवाँलो, पहाडमा हवा हुरी र चट्याङ

    डबली संवाददाता२०७८ बैशाख ८ गते
    २१९ पटक

    काठमाडौँ । फेरि देशका तराई क्षेत्रमा तुवाँलो लागेको छ । मंगलबार रातिबाट भारतबाट आएको तुवाँलो तराईका अधिकांश ठाउँहरुमा फैलिएको छ । भारतबाट आएको धुवाँ र तुवाँलो काठमाडौँसम्म पुगेको मौसमविदले बताएका छन् ।

    मौसम पूर्वानुमान महाशाखाका अनुसार काठमाडौंसहित पहाडी जिल्लामा पनि अहिले ‘भिजिबिलीटी’ कम रहेको छ भने केही स्थानमा मेघ गर्जनसहित हावा हुरी चलेको छ । मौसमविद् समीर श्रेष्ठका अनुसार सुदूरपश्चिम, कर्णाली, गण्डकीलगायत प्रदेशका पश्चिमी क्षेत्रमा बहानैदेखि मेघ गर्जनसहितको पानी पर्न लागेको श्रेष्ठले जानकारी दिए ।

    पश्चिमी वायुको प्रभाव र अरब सागरबाट जलवास्पयुक्त हावा नेपाल प्रवेश गरेकोले पश्चिमी क्षेत्रमा मेघ गर्जन र चट्याङ्गसहित पानी पर्ने मौसमविद् श्रेष्ठले बताए । सो क्षेत्रमा दिउँसो पनि मेघ गर्जन, चट्याङ्ग र हावाहुरीसहित पानी पर्ने सम्भावना रहेकोले सतर्कता अपनाउन महाशाखाले आग्रह गरेको छ ।

    केही दिन पहिले मात्रै काठमाडौँसहित देशका अधिकांश क्षेत्रमा घातक तुवाँलोले ढाकेको थियो । काठमाडौँ विश्वकै पहिलो प्रदुषित शहरको सूचीमा पुगेको थियो । तुवाँलो नफाटेपछि तीनदिनको लागि सम्पूर्ण शैक्षिक संस्था बन्द गरिएका थिए । त्यसपछि केही दिन हावा हुरी र वर्षासँगै तुवाँलो फाटेको थियो ।

    प्रतिकृया दिनुहोस्