काठमाडौं । कोरोना भाइरसको संक्रमण तीब्ररुपमा फैलिएपछि सरकारले शहरी क्षेत्रका विद्यालय बन्द गर्ने निर्णय गरेको छ । सोमबार प्रधानमन्त्री निवास बालुवाटारमा बसेको मन्त्रिपरिषद् बैठकले कोभिड–१९ संकट व्यवस्थापन केन्द्र (सीसीएमसी) को सिफारिस अनुसार शहरी क्षेत्रका विद्यालयहरु बन्द गर्ने निर्णय गरेको हो । बैशाख मसान्तसम्म विद्यालय विद्यालय बन्द गर्ने निर्णयसँगै सबै .शैक्षिक संस्थाहरुले अनलाइन कक्षा संचालन गर्न भनिएको छ ।
मन्त्रिपरिषद् बैठकले पारित गरेको कोभिड–१९ सम्बन्धी नयाँ आदेशमा शहरी क्षेत्रका विद्यालय भौतिक कक्षा सञ्चालन बन्द गर्न भनिएको छ । शनिबारको सीसीएमसी बैठकले वैशाख मसान्तसम्म शहरी क्षेत्रको विद्यालय बन्द गर्न सिफारिस गरेको थियो ।
नेपालमा कोरोनाको दोस्रो लहरप्रति लापरवाही भइरहेको भन्ने विज्ञहरुको कडाई गर्न चेतावनी दिइरहेका थिए । कोरोनाको नयाँ प्रजाति बालबालिका तथा युवा पिढिलाई बढी संक्रमण गर्ने सरुवा रोग विशेषज्ञ डा. शेरबहादुर पुनले बताएका थिए । उनले कोरोनाका नयाँ भेरियन्ट झन् शक्तिशाली भएको भन्दै बालबालिका बढी जोखिममा रहेको बताएका थिए ।
सरकारका प्रवक्ता तथा संचार तथा सूचना प्रविधि मन्त्री पार्वत गुरुङले वैशाख मसान्तसम्म शहर क्षेत्रका विद्यालय बन्द गरी अनलाइन कक्षा सञ्चालन गर्ने निर्णय गरेको जानकारी दिए ।
यसअघि स्वास्थ्य तथा जनसंख्या मन्त्रालयले शहरी क्षेत्रका विद्यालय बन्द गर्न प्रस्ताव गरेको थियो । तर मन्त्रिपरिषदले निर्णय नगरेपछि मन्त्रालयले काठमाडौं उपत्यकासहित १४ जिल्लालाई अति प्रभावित क्षेत्रमा राख्दै बालबालिकालाई विद्यालय नपठाउन अपील गरेको थियो ।
यसैगरी मन्त्रिपरिषद्को सोमबारको बैठकले विद्यालयका साथै सिनेमा हल, पार्टी प्यालेस, रंगशाला लगायतका भीडभाड हुने क्षेत्र पनि बन्द गर्ने निर्णय गरेको छ ।
