सुर्खेत । फ्लोर क्रसपछि मन्त्रीमा नियुक्त भएका तीन मन्त्रीलाई पद तथा गोपनियताको सपथ खुवाउने तयारी गरिएको छ । कर्णाली प्रदेशसभामा पार्टीको ह्पीव उलंघन गरेर सरकारलाई विश्वासको मत दिलाउन महत्वपूर्ण भूमिका खेलेका नन्दसिंह बुढा, अमरबहादुर थापा र कालिकोटका कुर्मराज शाहीलाई मुख्यमन्त्री महेन्द्रबहादुर शाहीले मन्त्रीमा नियुक्त गरेका थिए ।
कर्णाली प्रदेश सरकारकी प्रवक्ता विमला केसीका अनुसार आज साँझ तीनै जना मन्त्रीलाई शपथ खुवाउने कार्यक्रम तय गरिएको छ । प्रदेश सरकारले शनिबार नै प्रदेश प्रमुखलाई पत्र पठाइसकेको थियो ।
शनिबार मुख्यमन्त्री शाहीले नन्दसिंह बुढालाई भूमि व्यवस्था, कृषि तथा सहकारी, अमरबहादुर थापालाई भौतिक पूर्वाधार विकास र कुर्मराज शाहीलाई उद्योग, पर्यटन, वन तथा वातावरण मन्त्री नियुक्त गरेका थिए ।
अमरबहादुर र कुर्मराज पहिलोपटक मन्त्री बनेका हुन् भने नन्दसिंह पहिले पनि मन्त्री थिए । पहिले उद्योग, पर्यटन, वन तथा वातावरण मन्त्री बनेका बुढालाई अहिले भूमि व्यवस्था, कृषि तथा सहकारी मन्त्रालयको जिम्मेवारी दिइएको छ । पहिले भूमि व्यवस्था, कृषि तथा सहकारी मन्त्रालय सम्हालेकी विमला केसीलाई भने आर्थिक मामिला मन्त्रालयको जिम्मेवारी दिइएको छ ।
फ्लोर क्रस गरेका एमालेका अर्का सांसद प्रकाश ज्वाला भने मन्त्री बनेका छैनन् ।
पार्टीको ह्वीप नमानेर माओवादी केन्द्रबाट मुख्यमन्त्री बनेका शाहीलाई साथ दिएको भन्दै एमालेले तीजनालाई पार्टीको साधारण सदस्यसमेत नरहने गरी निस्कासन गर्न सिफारिस गरेको छ ।
