काठमाडौं । नेपाल पत्रकार महासंघको नयाँ नेतृत्वका लागि भएको मतदान अधिकांश शाखा र प्रतिस्ठानमा सकिएको छ । विहान ९ बजेदेखि देशैभर मतदान सुरु भएको भएको मतदान ५ बजे सकिएको हो ।
सबैभन्दा धेरै सदस्य भएको काठमाडौँ शाखाको मतदान पनि केही बेर सकिएको छ । मतदानको क्रममा सामान्य विवाद बाहेक मतदान नरोकिएको निर्वाचन समितिले जनाएको छ ।
महासंघको इतिहासमै पहिलो पटक प्रत्यक्ष निर्वाचन प्रणालीबाट निर्वाचन भएको हो । केन्द्र, प्रदेश र शाखाको नयाँ कार्यसमिति चयनका लागि एकै पटक मतदान सुरु भएको थियो । मतदानका लागि अपराह्न चार बजेसम्मको समय तोकिएको थियो । तर, मतदान पाँच बजेसम्म गएको थियो ।
देशभरबाट १३ हजार १ सय ८० पत्रकारहरुले तीन वर्षे कार्यकालका लागि आफ्नो नेता चुन्ने छन् ।
अध्यक्ष पदका लागि केन्द्रमा विपुल पोखरेल र निर्मला शर्मा प्यानलसहित प्रतिस्पर्धामा उत्रिएका छन् । पोखरेल प्रेस युनियन, प्रेस सेन्टर र प्रेस चौतारी (माधव नेपाल समूह) सहित ११ वटा संगठनको साझा उम्मेदवारको रुपमा छन् । एमालेको केपी शर्मा ओली निकट प्रेस चौतारीसहितको गठबन्धनबाट शर्मा मैदानमा छन् । उनीहरुबीच कडा टक्कर हुने अनुमान छ ।
अध्यक्ष पदका लागि स्वतन्त्र रुपमा गजेन्द्रसिंह बुढाथोकी पनि प्रतिस्पर्धामा उत्रिएका छन् । पोखरेल प्यानलबाट वरिष्ठ उपाध्यक्षमा रमेश विष्ट, समावेशी उपाध्यक्षमा उदय जीएम र महिला उपाध्यक्षमा बाला अधिकारी उम्मेदवार छन् । रोशन पुरी महासचिवको उम्मेदवार छन् । त्यस्तै खुला सचिवमा जन्मदेव जैसीले
शर्मा नेतृत्वको प्यानलबाट वरिष्ठ उपाध्यक्षमा माधव नेपाल, समावेशी उपाध्यक्षमा अवधेश झा र महिला उपाध्यक्ष दाना केसी सुवेदी उम्मेदवार छन् । यो प्यानलमा बालकृष्ण बस्नेत महासचिवको उम्मेदवार छन् । यसैगरी सचिव पदमा रामकृष्ण ज्ञवाली (खुल्ला), निमा काफ्ले (महिला), शाहीमान राई (आदिवासी जनजाति), स्वेता सिन्हा (मधेसी), मधु शाही (दलित) र रामेश्वर कार्की (एशोसिएट) उम्मेदवार बनेका छन् । कृष्ण गिरी कोषाध्यक्ष पदमा र द्वारिकाप्रसाद काफ्ले लेखा समितिको संयोजक पदमा प्रतिस्पर्धामा उत्रिएका छन् ।
यस वर्ष प्रत्यक्ष निर्वाचन प्रणाली अपनाइएकाले महासंघका केन्द्रीय पदाधिकारी र सदस्यलाई देशभरका सदस्यहरुले आआफ्नो मतदान केन्द्रबाट भोट हालेका थिए ।
