News Portal

  • नेपाल-खनाल समूहको राष्ट्रिय भेला आजबाट, केन्द्रदेखि जिल्लासम्म समानान्तर कमिटी

    डबली संवाददाता२०७७ चैत्र ४ गते
    २३५ पटक

    काठमाडौँ । नेकपा (एमाले)को माधव कुमार नेपाल र झलनाथ खनाल समूहको राष्ट्रिय भेला आज सुरु हुँदैछ । देशभरबाट दुई हजारभन्दा धेरैको सहभागिता हुने भेला विहान ११ बजेबाट सुरु हुने नेता योगेश भट्टराईले जानकारी दिए ।

    सर्वोच्च अदालतले एमाले ब्युँताएपछि पहिलो पटक यो समूहले अलगै भेलाको आयोजना गरेको हो । सर्वोच्चले एमालेलाई ब्युँताएपनि अध्यक्ष केपी शर्मा ओलीले एकलौटीरुपमा अगाडि बढेको भन्दै नेपाल खनाल समूहले प्रतिवाद गर्ने बताउँदै आएको थियो ।

    एमाले अध्यक्ष तथा प्रधानमन्त्री ओलीले फागुन २८ गते आफ्नो समूहको बैठक बसेर नेपाल खनाल समूहका नेताहरुको जिम्मेवारी खोसेका थिए । त्यसपछि नेपाल खनाल समूह आक्रोसित भएको थियो । स्थायी समिति बैठक बसेर ओलीको निर्णयको प्रतिवाद गर्ने निर्णय गरेको यो समूहले थप निर्णय लिने भन्दै भेला बोलाएको हो । यो भेलालाई एमालेको नयाँ जीवनमा महत्वपूर्ण मानिएको छ ।

    ओली र नेपालबीच भएको छलफल र राष्ट्रपति विद्यादेवी भण्डारीले बोलाएको सर्वदलीय बैठक बहिस्कारसम्मका एमाले नेताहरुको अभिव्यक्तिले पनि पार्टी विभाजन भइसकेको विश्लेषण गर्न थालिएको छ ।

    ओली समूहले भेला रोक्न अग्रहदेखि चेतावनीसम्म दिँदा पनि नेपाल समूहले नरोक्ने भन्दै बरु अध्यक्षले विधान मिचेको आरोप लगाउँदै आएको छ । नेपाल समूहका नेताहरु ओलीले विधान मिचेको भन्दै ओलीलाई कारवाहीको माग समेत गर्न थालेका छन् ।

    ओलीले बोलाएको केन्द्रीय समिति बैठकमा सहभागी नहुने भन्दै नेपाल समूहले देशभर समानान्तर कमिटी निर्माण गर्ने बताएको छ । सोही निर्णयलाई भेलाबाट पारित गरेर अगाडि बढ्ने बताइएको छ । भेलालाई वरिष्ठ नेता माधव कुमार नेपाल र झलनाथ खनालसहित शिर्ष नेताहरुले सम्बोधन गर्ने बताइएको छ ।

    प्रतिकृया दिनुहोस्