News Portal

  • आज महाशिवरात्री, पशुपतिसहित देशभरका शिवालयमा विगतको भन्दा भिडभाड कम

    डबली संवाददाता२०७७ फागुन २७ गते
    १३५ पटक

    काठमाडौं । आज महाशिवरात्रि । देशभरको शिवालयमा पूजा–आराधना गरेर मनाइँदैछ । कोरोनाका कारण विगतको भन्दा कमै दर्शनार्थी पूजाको लागि शिवालयमा पुगेका छन् ।

    वैदिक सनातन हिन्दू धर्मावलम्बी आज बिहानैदेखि नदी, कुण्ड र तलाउमा स्नान गरी शिवालयमा गइ पूजा–आराधना गर्छन् । शिवकाे विधिपूर्वक पूजा, आराधना, दर्शन गरे सुख शान्ति र मृ.त्युपछि सद्गति प्राप्त हुने हिन्दू धर्मावलम्बीहरूकाे विश्वास रहेकाे छ।

    आज काठमाण्डाैकाे पशुपतिका साथै नौलोगाउँ बझाङ, कैलाशमाडौँ बाजुरा, नर्वदेश्वर ओखलढुङ्गा, महोत्तरीको जलेश्वर, भक्तपुरको अनन्त लिङ्गेश्वर, काठमाण्डाै डिल्लीबजारको वसन्तेश्वर, जयबागेश्वरीको महामृत्युञ्जय, अमालकोट कचहरीको खञ्जनेश्वर, लुभुको गोभ्रातेश्वर, सुनाकोठीको भृङ्गारेश्वरलगायतका शिवालयमा विशेष उत्सवका साथ यो रात पूजा आराधना हुन्छ ।

    शिवजी उत्पत्ति भएको रातका नामबाट नामकरण भएको यो पर्व कालरात्रि, मोहरात्रि, सुखरात्रि र शिवरात्रि नामक चार प्रमुख रात्रिमध्ये एक पवित्र पर्वका रूपमा शिव पुराणलगायतका ग्रन्थमा उल्लेख गरिएको छ ।

    फाल्गुन कृष्ण चतुर्दशीका दिन मनाइने यस पर्वलाई दीन–दुःखी र कष्टपूर्ण अवस्थामा रहेका प्राणीको हृदयमा धर्मको उदय गराउने आशुतोष भगवान् शिवको अति प्यारो दिनका रूपमा पनि लिइन्छ ।

    आज हरेक घर, चोक र मठ–मन्दिरमा दाउरा मागेर धुनी जगाइ भजन–कीर्तनका साथ त्यसै आगोमा प्रसाद बनाइ ग्रहण गरिन्छ ।

    यसैबीच आज सेना दिवस पनि हो । सेनाले सैनिक मंच टुडिखेलमा विशेष कार्यक्रम आयोजना गरेको छ ।

    प्रतिकृया दिनुहोस्