वुटवल । नेपाल कम्युनिस्ट पार्टीका युवा नेता पूर्णबहादुर सिंह रिहा भएका छन् । विप्लव नेतृत्वको नेकपाको पाल्पा इन्चार्ज समेत रहका सिंह र मगर मुक्ति मोर्चा नेपालका पाल्पा अध्यक्ष मिनबहादुर आले विहीबार रिहा भएका हुन् ।
उच्च अदालत बुटवलले सिंह र आलेलाई रिहा गर्न आदेश दिएको थियो । दुबै जनालाई प्रहरीले पटकपटक पक्राउ गरेपछि बन्दी प्रत्यक्षीकरणको रिट दायर गरिएको थियो । उच्च अदालतका न्यायधीस अग्निप्रसाद थपलिया र हरिप्रसाद पौडेलको इजलासले सिंह र आलेलाई रिहा गर्न आदेश दिएको हो । बन्दीको तर्फबाट अधिवक्ता ज्ञानु केसीले बहस गरेकी थिइन् ।
नेता सिंह र आलेलाई मंसिर ४ गते बुटवलबाट प्रहरीले गि रफ्तार गरेको थियो । दुबै जनालाई प्रहरीले विस्फोटक-आगजनीको मुद्दा लगाएर नियन्त्रणमा राखेको थियो । पक्राउ परेसँगै उनीहरुलाई मंसिर ३० गते जिल्ला अदालत भैरहवामा उपस्थित गराइएको थियो ।
अदालतमा न्यायधीस कमलप्रसाद ज्ञवालीको आदेशमा साधारण तारेखमा रिहा गर्ने फैसला गरेको थियो । तर प्रहरीले पुनः गि रफ्तार गरेर पाल्पा लगेको थियो । पाल्पा अदालतले पुस १ गते न्यायधीश खड्क केसीले साधारण तारिखमा रिहा गर्न आदेश दिएका थिए । फेरपनि प्रहरीले अदालतको आदेशको उलंघन गर्दै सिंह र आलेलाई पुनः पक्राउ गरी गुल्मी लगेको थियो । गुल्मीमा प्रहरीले सिंह र आलेलाई अभद्र व्यवहारको मुद्दा चलाएको थियो ।
सिंह र आलेलाई गिरफ्तारी विरुद्ध नेकपा केन्द्रीय सदस्य एवं लुम्बिनी ब्युरो इन्चार्ज भीमले तत्काल रिहाई नगरे दलाल राज्यसत्ता र त्यसको गृहप्रशासन विरुद्ध सम्झौताहिन संघर्ष गर्ने बताएका थिए । नेता सिंह र आलेको गिरफ्तार गैरन्यायिक भएको भन्दै देशभर सर्वत्र विरोध समेत भएको थियो ।
अखिल (क्रान्तिकारी)का पूर्वकेन्द्रीय अध्यक्ष समेत रहेका सिंहका राजनीति र शिक्षासँग सम्बन्धित विभिन्न पुस्तकहरु समेत प्रकाशित हुनुका साथै विभिन्न पत्रपत्रिकाहरुमा राजनीतिक वैचारिक लेखहरु समेत निरन्तर प्रकाशित हुँदै आएका छन् ।
