पोखरा। सांसद तथा व्यवसायी सूर्यबहादुर केसीको आजै अन्त्येष्टि गरिएको छ । नेपाली काँग्रेसबाट प्रतिनिधि सभा सदस्य केसीको सोमबार राति १०ः३० बजे निधन भएको थियो ।
नेपालको पहिलो चाउचाउ (रारा)का मालिक समेत रहेका केसीको मंगलबार विहान परम्पराअनुसार अन्त्येष्टि गरिएको छ । नेपाली काँग्रेसका आमन्त्रिक केन्द्रीय सदस्य समेत रहेका ६३ वर्षीय केसी मिर्गौला रोगबाट पीडित थिए । पोखराका चर्चित व्यवसायी समेत रहेका केसीको रारा चाउचाउका लगानीकर्तासँगै जलविद्युत क्षेत्रमासमेत ठूलो लगानी रहेको छ । केसी माछापुच्छ्रे बैंकका संस्थापक समेत हुन् ।
त्यसैगरी केसीले २०२३ सालमा राइस मिल संचालन गरेका थिए । उनी व्यवसायीसँगै राजनीतिमा समेत आवद्ध हुँदै आएका थिए । तत्कालिन समयमा पोखरा नगर पञ्चालयका प्रधान समेत भएका थिए । राप्रपाबाट सांसद भइसकेका केसी पछि नेपाली काँग्रेसमा प्रवेश गरेका सांसद भएका थिए । केसीका श्रीमती र तीन जना छोरा छन् ।
यसैबीच पोखरा महानरपालिकाले केसीको निधनको शोकमा सबै कार्यालय बन्द गरेको छ । त्यस्तै, प्रधानमन्त्री केपी शर्मा ओली, काँग्रेस सभापित शेरबहादुर देउवालगायतका नेताहरुले केसीप्रति श्रद्धाञ्जली अपर्ण गर्दै परिवारमा समवेदन व्यक्त गरेका छन् ।
केसीले भारतको दिल्लीमा उपचार गराइरहेका थिए तर कोरोना महामारीका कारण नियमित जाँच गराउन पाएका थिएनन् ।
