काठमाडौँ । चिनियाँ जनमुक्ति सेना युद्धको लागि तयारी अवस्थामा रहेको छ । राष्ट्रपति सी जिनफिङले यही हप्ता सेनालाई उच्च सतर्कतासाथ सम्पूर्ण दिमाग र ऊर्जा युद्धको लागि तयारीमा राख्न निर्देशन दिएका थिए ।
चिनियाँ सरकारी संचारमाध्यम सिन्ह्वा न्युज एजेन्सीले सीले सो आदेश दिएको सार्वजनिक गरेको थियो । “सैनिकहरु उच्च सतर्कतासाथ रहनुपर्छ । तपाईँहरु आफ्नो सम्पूर्ण दिमाग र ऊर्जालाई युद्धका लागि तयार राख्नूस्” सीले भनेको भन्दै सिन्ह्वाले समाचार सम्प्रेशण गरेको थियो ।
सिन्ह्वाका अनुसार राष्ट्रपति सीले चाओझोउ सहरस्थित जनमुक्ति सेनाको जलसेनासँग भेटको क्रममा भने, “सैनिकहरु पूर्ण रुपमा वफादार, पूर्ण रुपमा शुद्ध र पूर्ण रुपमा विश्वासिलो हुनुपर्छ ।” रिपोर्ट अनुसार सीले आदेश दिने क्रममा प्रत्यक्ष रुपमा भारतको नाम लिएका थिएनन् ।
सीले आफ्नो सेनालाई युद्धको लागि तयारी अवस्थामा रहनु भनेको समाचार सार्वजनिक भएसँगै यसको विश्व राजनीतिमा चर्चाको विषय भएको छ । चीन भारती सीमा विवादलाई लिएर सीले यो आदेश नदिएको बताइएको छ ।
अमेरिकासँग बढ्दै गएको विवाद र अमेरिकाले दक्षिण चीन सागरमा गर्दै आएको सैन्य गतिविधिले चीन आक्रोसित भएको समाचारमा बताइएको छ । चिनियाँ कम्युनिस्ट पार्टीका महासचिव समेत रहेका राष्ट्रपति सीले अमेरिकले आफ्ना गतिविधि जारी राखे अवस्था जटिल हुन सक्ने चेतावनी दिँदै आएका थिए । तर, युद्धको लागि तयारी अवस्थामा रहन सार्वजनिक रुपमा आदेश भने पहिलो पटक दिएका हुन् । अमेरिकाले हङकङ र ताइवानमा पसेर चीनको सार्वभौमिकतामाथि आँच आउने गतिविधि गर्दै आएको छ ।
