काठमाडौं । प्रधानमन्त्री केपी शर्मा ओलीले मन्त्रिमण्डल पुनर्गठन गरेका छन् । ओलीले बुधबार तीन नयाँ मन्त्री थपसँगै रक्षा मन्त्रालयको जिम्मेवारी पनि आफैले लगेका छन् । रक्षामन्त्री इश्वर पोखरेललाई विना विभागीय मन्त्री बनाइएको छ । उनको कार्यविभाजन मन्त्रिपरिषद कार्यालय तोकिएको छ ।
ओलीले पार्टीका महासचिव विष्णु पौडेललाई अर्थमन्त्रीको जिम्मेवारी दिएका छन् भने कृष्णगोपाल श्रेष्ठ सहरी विकास र लिलानाथ श्रेष्ठ महिला बालबालिका मन्त्रीमा नियुक्त गरेका छन् । यसअघि महिला बालबालिका मन्त्री रहेका पार्वत गुरुङले सञ्चार मन्त्रालयको जिम्मेवारी दिइएको छ ।
अन्य मन्त्रीहरुमा भने यसअघिकै यथावत राखिएको छ । नवनियुक्त मन्त्रीलाई बुधबार राष्ट्रपति विद्यादेवी भण्डारीले नेपालको संविधानको धारा ७६ को उपधारा ९ बमोजिम अर्थमन्त्रीमा नियुक्त गरेकी छन् । उनीहरुको विहीबार सपथ खुवाउने कार्यक्रम रहेको छ ।
प्रधानमन्त्री ओलीले मन्त्री नियुक्तिमा एकलौटी गरेको आरोप पार्टीभित्रैबाट लागेको छ । अर्का अध्यक्ष प्रचण्ड र वरिष्ठ नेता माधव कुमार नेपालले पार्टीमा छलफल नगरेरै आफू खुशी मन्त्री नियुक्त गरेको बताएका छन् ।
यसअघि पार्टी विवाद समाधान कार्यदलले तयार पारेको कार्यदलको सुझावलाई प्रधानमन्त्री ओलीले पूरै वेवास्ता गरेको प्रचण्ड र नेपाल समूहले आरोप लगाएको छ । नयाँ मन्त्री नियुक्त मापदण्ड बनाएर गर्ने भनिएपनि ओलीले आफ्नै गुटका तीन नेतालाई मात्रै नियुक्त गरेपछि (नेकपा) भित्रको विवाद फेरि चुलिने एक नेताले बताए ।
मन्त्रिमण्डल पुर्नगठनबारे वरिष्ठ नेता माधव कुमार नेपाल र झलनाथ खनाललाई सामान्य पनि जानकारी नदिइएको बताइएको छ । बालुवाटार जग्गा विवादमा मुछिएका पौडेललाई अर्थमन्त्री बनाएपछि पार्टीभित्र र बाहिर प्रधानमन्त्री ओलीको विरोध भइरहेको छ ।
मन्त्रिमण्डल पुनर्गठन र महत्वपूर्ण राजनीतिक नियुक्तीमा पार्टीको निर्णय वा परामर्शमा गर्न ओली तयार भएपछि (नेकपा) भित्रको विवाद समाधान भएको थियो । तर स्थायी समितिले गठन गरेको कार्यदलको सुझाव र पार्टीमा भएको सहमति ल्याउँदै प्रधानमन्त्री ओलीले फेरि आफू खुशी गरेको भन्दै विरोध भएको छ । यसअघि राजदूत नियक्तिलाई लिएर असन्तुष्ट प्रचण्ड र नेपाल समूह थप चिढिएका छन् ।
