काठमाडौं । कर्णाली प्रदेशका मुख्यमन्त्री महेन्द्रबहादुर शाहीले सत्ता संकटकलाई टारेका छन् । पार्टीभित्रको एउटा समूहले अविश्वास प्रस्तावबाट पछि हटेसँगै सत्ता संकट टरेको हो ।
सत्तारुढ नेपाल कम्युनिस्ट पार्टी (नेकपा) का अध्यक्ष प्रचण्ड र वरिष्ठ नेता माधव कुमार नेपाल समूह एक भएका छन् । कर्णालीमा प्रधानमन्त्री तथा पार्टी अध्यक्ष केपी शर्मा ओली समूह एक्लिएको छ । ओली समूहका नेता तथा सांसद यामलाल कँडेलको अगुवाईमा १८ जना सांसहरुले मुख्यमन्त्री शाहीविरुद्ध अविश्वासको प्रस्ताव दर्ता गराएसँगै विवाद चरम उत्कर्षमा पुगेको थियो ।
संसदीय दलका नेता महेन्द्रबहादुर शाहीसँग मंगलबार भएको छलफलमा नेता नेपाल समूह पछि हट्न समहत भएको छ । त्यसको लागि मन्त्रिमण्डल पुर्नगठन गर्ने सहमति पनि भएको छ । सहमतिअनुसार नेपाल समूहले तीन मन्त्री र संसदीय दलको सचेतक पद पाउने भएका छन् । यो सहमतिसँगै मुख्यमन्त्रीविरुद्ध अविश्वास प्रस्तावमा हस्ताक्षर गरेका नेपाल समूहका ७ सांसदले आफ्नो समर्थन फिर्ता लिनेछन् । स्रोतका अनुसार एक मन्त्रालय खाली छ र पुर्नगठनमा ओली समूहका दुई मन्त्रीलाई हटाइने भएको छ ।
मुख्यमन्त्री शाहीविरुद्ध सुरुदेखि नै हात धोएर लागिपरेका ओली समूहका नेता यामलाल कँडेल फेरि पनि असफल भएका छन् । मुख्यमन्त्री बन्ने कँडेलको रहर पूरा गर्न लागिपरेका गुलाफजंग शाहको प्रमुख सचेतक पद खुस्किएको छ । अविश्वास प्रस्ताव दर्ता भएपछि आजको लागि संसदीय दलको बैठक बोलाएपछि उनलाई पदमुक्त गरिएको हो । मुख्यमन्त्री तथा दलका नेता शाहीले पदमुक्त गरेको घोषणा गरेका थिए ।
(नेकपा) एक नेताले सरकारले ढाल्ने कँडेलको योजना असफल भएको छ र उनको स्वार्थको लागि गुलावजंग बलिको बोका भएको बताए ।
