News Portal

  • सभामुख र मन्त्री केसीलाई कोरोना, सांसददेखि कर्मचारीसम्म त्रास

    डबली संवाददाता२०७७ असोज २४ गते
    ३४४ पटक

    बुटवल । लुम्बिनी प्रदेश सभाका सभामुख पूर्णबहादुर घर्ती मगर र आन्तरिक मामिला तथा कानुन मन्त्री कुलप्रसाद केसीलाई कोरोना संक्रमण पुष्टि भएपछि सांसददेखि कर्मचारीमा मनोवैज्ञानिक त्रास फैलिएको छ । भरखरै प्रदेश राजधानी र नाम पास गर्न संसद बैठक बसेको बेला सभामुख घर्ती र मन्त्री केसीले कर्मचारी तथा सांसदहरुसँग पटकपटक छलफलमा सहभागी भएका थिए ।

    शुक्रबार लुम्बिनी प्रादेशिक अस्पताल बुटवलमा गरिएको परीक्षणमा सभामुख घर्तीमा संक्रमण पुष्टि भएको थियो । उनलाई ज्वरो आएपछि बिहीबार पीसीआर परीक्षणका लागि स्वाब दिएको थियो । आजै मन्त्री केसीलाई कोरोना संक्रमण भएको पुष्टि भएको थियो । उनिहरुको प्रत्यक्ष सम्पर्कमा आएकाहरुको पीसीआर परिक्षणको तयारी भइरहेको छ ।

    कोरोना संक्रमण पुष्टि भएसँगै सभामुख घर्ती बुटवल रामनगरस्थित सरकारी निवासमै आइसोलेसनमा बसेका छन् । सभामुख घर्तीले आफ्नो सम्पर्कमा आएका सबैलाई आइसोलेसनमा बस्न र परीक्षण गरी सुरक्षित हुन आग्रह गरेका प्रेस संयोजक गणेश ओलीले संचारमाध्यमलाई बताएका छन् ।

    त्यसैगरी मन्त्री केसी पनि सरकारी निवासमै आइसोलेसनमा बसेका छन् । यस्तै संसदीय मामिला पत्रकार समाज प्रदेश ५ का सचिव सीपी खनालसहित तीनजना पत्रकारमा पनि कोरोना संक्रमण पुष्टि भएको छ । शुक्रबार बुटवलमा ३२ जना नयाँ संक्रमित थपिएका छन् । योसँगै बुटवलमा सक्रिय संक्रमितको संख्या  ५९० जना पुगेको छ ।

    नेपालमा कोरोना संक्रमितको संख्या १ लाख नाघेको छ । स्वास्थ्य तथा जनसंख्या मन्त्रालयका अनुसार शुक्रबार थप २ हजार ५९ जनामा कोरोना संक्रमण पुष्टि भएसँगै संक्रमितको संख्या लाख नाघेको हो । त्यस्तै हिजो काठमाडौं उपत्यकामा १ हजार ४ सय ९ जनासहित नयाँ संक्रमति थपिएका थिए ।

    मन्त्रालयका प्रवक्ता डा.जागेश्वर गौतमले नियमित प्रेस ब्रिफिङमा काठमाडौं १११६, भक्तपुर १३० ललितपुर १६३ नयाँ संक्रमित थपिएको जानकारी दिए ।

    शुक्रबार एकैदिन २ हजार ५९ जनामा कोरोनाभाइरस संक्रमण पुष्टि भएसँगै संक्रमितको संख्या एक लाख नाघेको छ । मन्त्रालयका प्रवक्ता गौतमले संक्रमितको संख्या १ लाख ६७६ पुगेको छ ।  जसमा सक्रिय संक्रमित २७ हजार ५३ पुगेका छन् । उनीहरुमध्ये आइसोलेशनमा ११ हजार १७६ जना र होम आइसोलेशनमा १५ हजार ८७७ जना रहेका छन् ।

    शुक्रबार थप १ हजार ६ सय ८० जना कोरोना निको भएर घर फर्किएका छन् । योसँगै नेपालमा कोरोना ७३ हजार २३ पुगेको छ ।

    त्यसैगरी कोरोना संक्रमणबाट आज थप १० जनाको ज्यान गएको छ । योसँगै नेपालमा कोरोनाका कारण ज्यान गुमाउनेको संख्या ६ सय पुगेको छ ।

    प्रतिकृया दिनुहोस्