काठमाडौँ । नेपाली काँग्रेसका महामन्त्री डा. शशांक कोइरालाले होम आइसोलेसनबाटै वीपी जयन्तीको अबसरमा सन्देश दिएका छन् । कोइराला कोरोना भाइरस संक्रमण पुष्टि भएपछि होम आइसोलेशनमा बसेका छन् ।
आज १०७ औं वीपी जयन्ती अबसरमा कोइरालाले राष्ट्रियता र प्रजातन्त्र एक अर्कोका परिपुरक भएको बताउँदै राष्ट्रहित चाहनेहरु एक भएर राष्ट्रियता र प्रजातन्त्रको संरक्षण गर्दै प्रजातान्त्रिक समाजवादको माध्यमबाट नेपाल र नेपालीको हित निमित्त गम्भिरताका साथ अघि बढ्नु पर्ने बताएका छन् ।
महामन्त्री कोइरालाले वि.पी. नेपाली साहित्यको फरक बिम्ब र बहुआयामिक व्याक्तित्वको धनी भएको भन्दै अगाडि भनेका छन्, ‘राजनेता वि.पी. कोईराला नेपाली साहित्यको फरक बिम्ब र बहुआयामिक व्यत्तित्वका धनि हुनुहुन्थ्यो । नैतिकतालाई राजनितिमा पहिलो अनिवार्य योग्यताकारूपमा लिनुहुदै नैतिकताले नै राजनीति सफल हुनेमा दृढ उहाँले सदैव आफु भन्दा पार्टी र पार्टी भन्दा देशलाई महत्व दिने संस्कारको विकास गर्नु भएको थियो ।’
मंगलबार गरिएको कोरोना परीक्षणको क्रममा महामन्त्री कोइरालालाई संक्रमण पुष्टि भएको थियो । संक्रमण पुष्टि भएसँगै आफू होम आइसोलेनमा बसेको उनले सामाजिक संजालमार्फत जानकारी गराएका थिए । उनल आफूलाई कुनै लक्ष्ण समेत नभएको बताउँदै प्रत्यक्ष सम्पर्कमा आएकाहरुलाई सचेत रहन समेत भनेका छन् ।
कोरोना संक्रमण पुष्टिपछि कोइरालाले लेखेका छन्ः
प्रिय साथीहरू ! आज गरिएकाे परीक्षणका क्रममा म मा काेराेना संक्रमण पुष्टि भएकाे छ । हाल मलाई स्वास्थ्य सम्बन्धी कुनै समस्या देखिएको छैन । चिकित्सकहरुकाे सल्लाह अनुसार हाल म हाेम आइसाेलेसन (Home Isolation) मा बसेकाे छु । मसंग प्रत्यक्ष सम्पर्कमा आउनुभएका सम्पूर्णमा आवश्यक सजगता अपनाउनुहुन अनुराेध गर्दछु । जय नेपाल
