काठमाडौं । रातोखबर साप्ताहिकका निर्देशक तथा मास्र्कवादी लेखक अनिल शर्मा ‘बिरही’लाई प्रहरीले अस्पतालबाटै पुनः गिरफ्तार गरेको छ । उपचारमा बाधा नपुर्याउन अदालतले दिएका आदेशविरुद्ध प्रहरीले शनिबार विरहीलाई गिरफ्तार गरेको हो ।
भारतपुर अस्पतालमा उपचाररत विरहीलाई प्रहरीले डिस्चार्ज गर्न दवाव दिँदै आएको परिवारले जनाएका छन् । भर्याङबाट लडेर ढाँडमा गम्भीर चोट लागेर अस्पतालमा उपचार गराउँदै गर्दा विरहीलाई प्रहरीले गिरफ्तार गरेको थियो । नेता विरही विगत तीन महिनादेखि अस्पतालमै थिए ।
विरहीलाई धनुषा लगिने चितवन प्रहरीले शनिबार बताएको थियो । धनुषाको पत्र आएको बताउँदै चितवन प्रहरी प्रवक्ता सूर्यबहादुर थापाले उता पठाइएको बताए । अस्पतालको गेटबाटै जिल्ला प्रहरी कार्यालयको भ्यानले प्रहरी कार्यालय पु¥याइएको थियो ।
पुरानो मेडिकल कलेजमा उपचार गराइरहेको अवस्थामा विरहीलाई प्रहरीले वैशाख २३ गते गिरफ्तार गरेको थियो । शर्माका पक्षबाट जिल्ला अदालत चितवनले रिहासँगै उपचारमा कुनै बाधा नपुर्याउन आदेश दिएको थियो । अस्पतालमा रहँदासम्म प्रहरीले घेरा हालेर बसेको थियो ।
गम्भीर स्वास्थ्य समस्या हुँदा समेत प्रहरीले मानवीयता गुमाउँदै गि्रफ्तार गरेको भन्दै मानवअधिकारकर्मी, पत्रकार, कानुनव्यवसायी, लेखक, साहित्यकारले विरोध जनाएका छन् । उनीहरुले विरहीको रिहाईको माग समेत गरेका छन् ।
