News Portal

  • मध्यपुर थिमि नगरपालिकामा आजबाट लकडाउनः विहान ११ बजेदेखि १ सम्म मात्रै पसल खोल्न पाइने

    डबली संवाददाता२०७७ साउन ३२ गते
    ४६७ पटक

    भक्तपुर । मध्यपुरथिमि नगरपालिका क्षेत्रभित्र भदौ ९ गतेसम्म लकडाउन गरिएको छ । त्यस्तै, नगरपालिकाका सबै वडाहरुबाट प्रवाह हुने सबै सेवा बन्द गरिएको छ । नगर विपद व्यवस्थापन समितिको शनिबार बसेको आकस्मिक बैठकले नगरक्षेत्रभित्र साउन ३२ देखि भदौ ९ सम्म लकडाउन गर्ने निर्णय गरेको प्रमुख कार्यकारी अधिकृत उद्धव प्रसाद रिजालले बताए ।

    नगरपालिकामा ४६ जनामा कोरोना संक्रमण देखिएकोले संक्रमण थप हुन नदिन सिल गरिएको रिजालले अनलाइन डबलीसँग बताए । नगरपालिका क्षेत्रभित्र विहान ११ बजेदेखि दिउँसो १ बजेसम्म मात्रै अत्यावश्यक खाद्य पदार्थ, पानी, ग्यास र औषधि पसल खोल्न पाइने रिजालले बताए ।

    अनलाइन डबलीसँग कुरा गर्दै रिजालले आज पहिलो दिन स्थानीयले सरकारको निर्देशनको पूर्ण पालना गरेको बताए । “कोरोना समुदायमा थप संक्रमण हुनबाट नगरपालिकाका क्षेत्रमा लकडाउन गरिएको हो । पहिलो दिन आज स्थानीयले पूर्ण पालना गरेका छन्” रिजालले भने । उनले स्थानीय सरकारले जारी गरेको निर्देशनको पूर्ण पालन गर्न पनि आग्रह समेत गरे ।

    स्थानीय सरकारले नगरपालिका क्षेत्रमा पर्ने अरनिको राजमार्गको पूर्वतर्फ हनुमन्ते नदी तथा राधेराधेदेखि पश्चिमतर्फ जडिबुटी मनोहरा पुलसम्म कुनै सवारी साधनले मान्छे चढाउन र ओराल्न नपाउने निर्णय गरेको थियो । नगरपालिकाले संघीय सरकारलाई अरनिको राजमार्गमा यातायातका साधन सञ्चालनमा रोक लगाउन पनि माग गरेको छ । तत्कालका लागि अरनिको राजमार्गमा कुनै सवारी साधन रोक्न, यात्रु चढाउन र ओराल्न नपाइने गरी लकडाउनको निर्णय गरिएको छ ।

    नगरपालिका क्षेत्रभित्र कुनै पनि सडकमा अत्यावश्यक सवारी साधनबाहेकका सवारी साधन सञ्चालनमा पूर्ण रुपमा रोक लगाइएको छ ।

    त्यसैगरी नगरपालिकाद्वारा सञ्चालित नेपाल कोरिया मैत्री नगरपालिका अस्पताल सिल गरिएको छ । अस्पतालमा कार्यरत तीन नर्ससहित चार जनामा कोरोना संक्रमण पुष्टि भएको छ । उनीहरु सबै स्थानीय भएकोले कोरोना स्थानीय समुदायमा पुगेको आशंका बढेको कार्यकारी प्रमुख रिजालले जानकारी दिए ।

    प्रतिकृया दिनुहोस्