धनगढी । नेपाल कम्युनिस्ट पार्टीका केन्द्रीय सदस्य तथा सेती महाकाली ब्यूरो इन्चार्ज ओमप्रकाश पुन कारागार चलान भएका छन् । नेकपाका केन्द्रीय सदस्य समेत रहेका पुनलाई जिल्ला अदालत कैलालीमा रिहा गर्न आदेश दिएको थियो ।
सोमबार न्यायाधीश जयानन्द पनेरुको एकल इजलासले पुनलाई ५० हजार धरौटीमा रिहा गर्न आदेश दिएका थिए । तर, प्रहरीले पुनः गिरफ्तार गर्ने तयारी गरेपछि पुन धरौटी तिर्न मानेन् । धरौटी नतिरेपछि पुनलाई सोमबार नै कारागार चलान गरिएको जिल्ला अदालत कैलालीका स्रेस्तेदार राइभान कुन्जेडाले जानकारी दिए ।
नेता पुनले पत्रकारसँग संक्षिप्त कुरा गर्दै प्रहरीले अर्को मुद्दा लगाउने निश्चित भएकोका कारण धरौटी नतिरी कारागार जाने निर्णय गरेको बताए । उनले प्रहरीले लगाएका सबै आरोप झुटा भएको प्रमाणित भइसकेको बताए । उनले राजनीतिक आस्थाकै कारण आफूलाई गि रफ्तार गरिएको बताए ।
आफ्नो पार्टीले गलत कामकारवाहीको विरोध गरेकै कारण सरकारले आफ्नो पार्टीमाथि प्रतिबन्ध लगाएको बताए । उनले प्रतिबन्धले जनताको परिवर्तनको चाहनालाई रोक्न नसक्ने पुनले बताउँदै पुनले जेललाई आफूले संघर्षकै मैदानको रुपमा लिएको समेत बताए । असार ३१ गते प्रहरीले पुनलाई धनपा वडा नम्बर ७ को कनरी क्षेत्रबाट गिरफ्तार गरेको थियो ।
