News Portal

  • विद्यालयको घेरा पर्खाल लगाउँदा रामारोशन गाउँपालिकाका अध्यक्ष भाष्करको संलग्नता नक्कली बिल बनाएर भ्रष्टाचार

    डबली संवाददाता२०७७ साउन ७ गते
    ९९७ पटक

    अछाम । जिल्लाको रामारोशन गाउँपालिकाका अध्यक्ष झंकर साउदको संलग्नतामा भ्रष्टाचार भएको भन्दै नेपाल कम्युनिस्ट पार्टीले फिर्ता गर्न भनेको छ । विप्लव नेतृत्वको नेकपाको जिल्ला जनपरिषद् अछाम अन्तरगत गाउँजनपरिषद् रामारोशनले विज्ञप्ति जारी गर्दै भ्रष्टाचार रकम फिर्ता गर्न भनेको हो ।

    गाउँजनपरिषद् प्रमुख राकेशले विज्ञप्ति जारी गरेर गाउँपालिकाको वडा नं. ५ स्थित निलकण्ठ माविको घेरा पर्खाल लगाउँदा अध्यक्ष साउदको संलग्नतामा ५ लाख ९९ हजार बढी भ्रष्टाचार भएको उल्लेख गरेको छ । प्राविधिक मूल्यांकन ८ लाख ६९ हजारको बिल उठाएको तर अध्यक्ष साउदको दवावमा १५ लाख ३० हजार रकम भुक्तानी गरेर भ्रष्टाचार गरेको भन्दै गाउँजनपरिषद् प्रखुम राकेशले ध्यानाकर्षण भएको बताएका छन् ।

    “रामारोशन गाउँपालिका–५ स्थित निलकण्ठ माविको घेरा पर्खाल लगाउन गाउँपालिकाद्वारा आ.ब. २०७६÷७७ मा रु. १५,३०,००० ।– बजेट बिनियोजन गरिएकोमा जम्मा कामको करिब ३० प्रतिशत पनि काम पूरा नभई गाउँपालिका अध्यक्ष झंकर साउद ‘भाष्कर’को प्रत्यक्ष संलग्नता र दबाबमा प्राबिधिकको मूल्याकंन प्रतिबेदन र बिल भर्पाइ बिपरित सबै रकम भुक्तानी गरिएकोप्रति हाम्रो गम्भीर ध्यानाकर्षण भएको छ । प्राबिधिक मूल्यांकनअनुसार रु. ८,६९,४२२ को बिल भर्पाइ उठाइएकोमा गाउँपालिका अध्यक्षको दवावमा रु. ६१,२०१ कन्टिजेन्सी बाहेक रु. ५,९९,३७७ रुपैयाँ बढी भुक्तानी गराई भ्रष्टाचार गरिएको छ । यस गाउँपालिकाका अध्यक्ष साउदको बारेमा अनियमितता र भ्रष्टाचार सम्बन्धि बारम्बार जनताको गुनासो र खबरदारी रहेको कुरा पनि सर्वबिदितै छ” विज्ञप्तिमा भनिएको छ ।

    प्रमुख राकेशले अध्यक्ष भाष्कर कमिसन र भ्रष्टाचारमा लिप्त रहेको भन्दै पदीय शक्तिको दुरुपयोग गरि जनताको रगत पसिनाले तिरेको कर र विभिन्न बिकासे आयोजनाहरुमा बदमासी गरिरहेकोले यस्तो क्रियाकलाप तुरुन्तै रोक्न, नाजायज रुपमा गरिएका भुक्तानी फिर्ता गर्न र जनताको अगाडि माफी माग्न समेत भनेका छन् । विज्ञप्तिमा राकेशले अख्तियर दुरुपयोग अनुसन्धान आयोगलाई उक्त अनियमिततासहित यस गाउँपालिकामा सन्चालित विभिन्न बिकासे आयोजनाहरुमा भइरहेको कमिसन, भ्रष्टाचार र अनियमितता छानबिनको लागि ध्यानाकर्षण समेत गराएका छन् ।अध्यक्ष भास्करले भ्रष्टाचार र अनियमितता नरोके जनकारवाही गर्ने चेतावनी गाउँजनपरिषदले दिएको छ ।

    यसअघि अनलाइन डबलीले वडा सदस्य खगेन्द्र रोकायसहितका विद्यालयका प्रअको संलग्नतामा नक्कली बिल बनाएर पूरै रकम भुक्तान दाबी गरिएको र बिल भुक्तानीको लागि अध्यक्ष साउदले कर्मचारीलाई दवाव दिन थालेको समाचार प्रकाशित गरेको थ‍ियो ।

    विज्ञप्ति

    प्रतिकृया दिनुहोस्