सुर्खेत । कर्णाली प्रदेशमा कोरोना भाइरस संक्रमणभन्दा निको हुने दर बढिरहेको छ । आइतबार थप २१ जनामा कोरोना संक्रमण पुष्टि भएको हो । त्यस्तै, विभिन्न आइसोलेसनबाट ४३ जना कोरोनामुक्त भएर घर फर्केका छन् ।
सामाजिक विकास मन्त्रालयको स्वास्थ्य सेवा महाशाखाका अनुसार आइतबारसम्म कुल संक्रमितको संख्या १ हजार ६ सय १६ पुगेको छ । जसमा १ हजार ४ सय ८ व्यक्तिले कोरोना जितेर घर फर्केका छन् ।
महाशाखाले आइतबार दिएको जानकारीअनुसार सुर्खेतस्थित कर्णाली प्रदेश अस्पता, पशुपन्छी रोग अन्वेषण प्रयोगशाला, कर्णाली स्वास्थ्यविज्ञान प्रतिष्ठान जुम्ला, दैलेख अस्पताल र पश्चिम रुकुमको चौरजहारीको प्रयोगशालामा भएको परीक्षणबाट थप २१ जनामा कोरोना संक्रमण पुष्टि भएको हो ।
महाशाखाका अनुसार सुर्खेतको वीरेन्द्रनगर नगरपालिका, गुर्भाकोट नगरपालिका र सिम्ता गाउँपालिका ४ महिलासहित ११ जना, कालीकोटको महाबै गाउँपालिका, खाँडाचक्र नगरपालिका र सान्नी त्रिवेणी गाउँपालिका २ महिलासहित ७ जना रहेका छन् ।
यस्तै रुकुम पश्चिमको जौरजहारीका दुईजना पुरुष र दैलेखको आठबीस नगरपालिकाकी एक महिला रहेकी छन् । अब कर्णाली प्रदेशमा २ सय २ जना मात्रै संक्रिय संक्रमित रहेको महाशाखाले जनाएको छ ।
