धनगढी । सुदूरपश्चिम प्रदेशमा पछिल्ला दिनमा कोरोना संक्रमित भन्दा निको हुनेको संख्या बढेको छ । शुक्रबारसम्म एक हजार दुई सय ६७ जनाले कोरोना जितेका छन् । प्रदेशको सामाजिक विकास मातहतको स्वास्थ्य महाशाखाका प्रमुख नरेन्द्र कार्कीले दिएको जानकारीअनुसार ९ वटै जिल्लाका गरी शुक्रबारसम्म उनीहरु विभिन्न अस्पताल तथा आइसोलेसनबाट डिस्चार्ज गरिएको हो ।
अहिलेसम्म सबैभन्दा बढि कञ्चनपुरका ३ सय ५६ जना, बैतडीका २ सय ५२, डडेल्धुराका १ सय ८८, अछामका १ सय ६४ र डोटीका १ सय ५७ र कैलालीका १ सय एक जना संक्रमितलाई अस्पताल र क्वारेन्टिनबाट डिस्चार्ज गरिएको कार्कीले जानकारी दिए ।
त्यसैगरी बझाङबाट ३४, दार्चुलाबाट १३ र बाजुराबाट दुई जनाले कोरोना जितेर घर फर्केका छन् । उनीहरुमध्ये १४ दिनसम्म अस्पतालमा भर्ना गरेर लक्षण नदेखिएर र केहीलाई लक्षण देखिएर पनि कोरोनासँग जितेका छन् ।
अहिले सुदूरपश्चिमका विभिन्न अस्पतालमा ८० जनाको उपचार भइरहेको छ । महाशाखाका अनुसार टीकापुर अस्पतालमा ३९, महाकाली अस्पतालमा १८, अछाम अस्पतालमा १०, सेती अस्पतालमा ६, मालाखेती अस्पतालमा तीन, डोटी र बाजुरा अस्पतालमा दुईरदुई जना गरी ८० जनाको उपचार भईरहेको छ ।
प्रदेशका ३ हजार ९११ संक्रमितमध्ये २ हजार ५५३ जना आफ्नै घर र क्वारेन्टाइनमै राखिएको छ । घर र क्वारेन्टाइमै रहेका संक्रमितबाट अरुमा कोरोना सर्ने चिन्ता पनि गरिएको छ । तर, लक्षण नदेखिएसम्म अस्पतालले भर्ना नलिने गरेको बताएको छ ।
सुदूरपश्चिममा ८ जनाको कोरोना कारण ज्यान गइसकेको छ । अहिले अस्पतालमा उपचार गराइरहेकामध्ये कसैको पनि गम्भीर अवस्था नभएको बताइएको छ । संकलन गरिएको स्वाब हुन नसक्दा विभिन्न क्वारेन्टिनमा रहेकाहरु समस्यामा परेका छन् । उनीहरुमा न कोरोना पुष्टि भएको छ न घर जान नै पाएका छन् । सुदूरपश्चिमका सबै जिल्लाहरुमा आरडिटी परिक्षण गरिएकाहरुको पीसीआर परीक्षण हुन सकेको छैन ।
- फाइल फोटो
