काठमाडौँ । देशभर लगातार बर्षाका कारण ठाउँठाउँमा पहिरो जानुको साथै बाढी आएको छ । बर्षाका कारण विहीबार विहानसम्म पहाडी जिल्लाको धेरै ठाउँहरुमा पहिरो गएको छ भने तराईमा बाढी आएको छ ।
बर्षाका कारण पोखरामा तीन ठाउँमा पहिरो गएको छ । कास्कीको पोखरा महानगरपालिका–१८ सराङकोट गोठदीमा पहिरो गएको छ । पहिरोले टंकबहादुर थापाको बगाएको छ । पहिरोमा पुरिँदा तीन जनाको ज्यान गएको छ । पहिरोमा परी अन्य ६ जना घाइते भएका छन् । कास्की प्रहरीका अनुसार थापाको घरमा विहीबार साँझ जन्म दिन मनाउने कार्यक्रम भएकोले परिवार तथा आफन्तको जमघट भएकोले कति जनाको हराएका छन् भन्ने एकिन हुन सकेको छैन ।
पहिरोका घाइतेको उद्दार गरी मणिपाल शिक्षण अस्पताल र पश्चिमाञ्चल अस्पतालमा उपचार भइरहेको छ । घाइतेमध्ये दुई जनाको अवस्थामा गम्भीर रहेको बताइएको छ ।
त्यसैगरी पोखरा महानगरपालिका–२५ हेमजामा अर्को पहिरो गएको छ । पहिरोले स्थानीयल रामचन्द्र अधिकारीको घर पहिरोमा पुरिएको छ । पहिरोमा परी अधिकारीकी आमा ७० वर्षीया भीमकली अधिकारीको ज्यान गएको छ ।
पोखराकै छोरेपाटन सिमलटुँडामा पनि पहिरो गएको छ । पहिरोले स्थानीय चन्द्रबहादुर मगरको घरमाथि बाट आएको पहिरोमा परी माथिबाट खसेको पहिरोमा परी तीन जना घाइते भएका छन् । प्रहरीका अनुसार पहिरोमा परी मगरसँगै श्रीमति शान्ति र छोरा सुशान पनि घाइते भएका छन् । उनीहरुको नमस्ते अस्पतालमा उपचार भइरहेको छ ।
अविरल वर्षासँगै पोखराको रामघाटस्थित सेती नदी थुनिँदा सुकुम्वासी बस्ती डुबानमा परेको छ । स्थानीयवासीलाई राति नै सुरक्षित स्थानमा सारिएको छ ।
त्यसैगरी अविरल वर्षाका कारण म्याग्दीको धौलागिरि गाउँपालिका–६ मराङको रिखामा पहिरो गएको छ । शुक्रबार विहान गएको पहिरोमा परी सात जना बेपत्ता भएका छन् । पहिरोमा परी दुई घर पुरिएका छन् ।
स्थानीयका अनुसार भीमप्रसाद जुग्जाली र धनबहादुर जुग्जालीको घर पहिरोले बगाएको छ हो । पहिरो आउँदा दुबै घर परिवारको कोही पनि भाग्न सफल नभएको बताइएको छ । पहिरोका कारण घण्टीवाङ गाउँ १३ परिवार पहिरोले विस्थापित भएका छन् । घण्टीवाङलाई पहिरोले चारैतिरबाट घेरेकोले अन्य गाउँ जान पनि सकिएको छैन ।
त्यसैगरी मराङकै कल्लेनीको धारखोलामा आएको बाढीले वीरबहादुर पुन र परदेवी पुनको घर बगाएको छ । स्थानीयका अनुसार घरका मानिसहरुले भागेर ज्यान जोगाउन सफल भएका छन् ।
पहिरोका कारण देशभरका सडकहरुमा पनि पहिरो गएको छ । यातायात अवरुद्ध भएका छन् । यसैबीच बेनी–जोमसोम सडक खण्डको बेलिब्रिज बाढीले बगाएको छ । घुगङ्गा नदीमा आएको बाढीले म्याग्दीको उत्तरी क्षेत्र हँुदै हिमाली जिल्ला मुस्ताङ जोड्ने बेनी–जोमसोम सडकको राहुघाटस्थित उक्त पुल बगाउँदा सडक अवरुद्ध भएको छ ।
त्यसैगरी देशका विभिन्न स्थानमा पहिरो गएको छ । कैलाली, बर्दिया, बाँकेलगायतका तराईका जिल्लाहरुमा धेरै भाग बाढीले डुबाएको छ ।
