![](https://onlinedabali.com/wp-content/uploads/2020/07/barsa.jpg)
काठमाडौं । पानी पर्ने विषयलाई लिएर सरकारका दुई निकायको मत बाडिएको छ । गृह मन्त्रालय अन्तरर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणले चार दिनसम्म ठूलो पानी पर्ने भन्दै सतर्क रहन भनेको छ । उसले ठूलो पानी पर्ने भएकोले बाढी, पहिरो र डुबानको जोखिम बढेको बताएको छ ।
प्राधिकरणले आजदेखि आइतबारसम्म प्रदेश १, २, वाग्मती र गण्डकी प्रदेशमा धेरै पानी पर्ने बताएको छ । पहाडी क्षेत्रमा साना खोला, खहरे, नदी र तालमा बाढी आउने सम्भावना रहेको प्राधिकरणले जनाएको छ ।
भोलिदेखि आइतबारसम्म कन्काई, कोशी, कमला, वग्मती, नारायणी र यसका सहायक नदीमा पानीको सतह बढ्न सक्छ । विषेशगरी प्रदेश १ र २ का चुरे तथा तराई भएर बस्ने खोला तथा नदीहरुमा ठूलो बाढी आउनसक्ने हुनाले यस क्षेत्रका बासिन्दाहरुलाई थप सर्तक रहन सूचनामार्फत आग्रह गरिएको छ ।
झापा, मोरङ, सुनसरी, सप्तरी, धनुषा, महोत्तरी, सिराहा, सर्लाही, बारा, पर्सा, रौतहट, चितवनलगायतका जिल्लाका होचा ठाउँमा डुबानको खतरा रहेको पनि प्राधिकरणले जनाएको छ ।
तर, सरकारकै अर्का निकाय मौसम पूर्वानुमान महाशाखाले भने उक्त कुरा गलत भएको बताएको छ । महाशाखाका मौसमविद् बरुण पौडेलले यो वर्ष मनसुन सुरु भएदेखि नै राम्ररी पानी परिरहेको र आजदेखि मनसुन थप सक्रिय मात्रै हुने बताउँछन् । लगातार पानी परिरहेकाले हिजो अस्तिदेखि नै बाढी, पहिरो र डुबान भइरहेको र मनसुन थप सक्रिय मात्रै हुने महाशाखाले जनाएको छ ।
सरकारकै दुई निकायको मत फरकफरक हुँदा कसको विश्वास मान्ने भन्नेमा नागरिक अन्यौलमा छन् ।
यसैबीच अबिरल बर्षासँगै आएको पहिरोका कारण सिन्धुपाल्चोकको बाह्रबिसेमा दुई जनाको ज्यान गएको छ । गएराति आएको पहिरोले थप १८ जना बगाएको छ । भोटेकोशो र ठाडोखोलाको जलाधार क्षेत्रमा भारी बर्षासँगै बाढी आएको हो ।
भोटेकोशी र ठाडोखोलामा आएको बाढीले ठूलो क्षति पुगेको बाह्रबिसे नगरपालिकाको खाटचौर भन्ने स्थानमा अरनिको राजमार्गको पक्की पुल समेत बगाएको स्थानीयले बताएका छन् ।
रातिबाट परेको बर्षासँगै विहानतिर मानव बस्तीमा प्रवेश गरेको बताइएको छ । बाढीले जम्बो भन्ने स्थानमा आएको बाढीले ८ भन्दा बढी घर बगाएको छ । रातिको समय भएकोले मानव क्षति बढी भएको हो ।