धनगढी । अविरल बर्षाका कारण बझाङमा पहिरोमा परी ठूलो धनजनको क्षति भएको छ । बझाङ जिल्लाको केदारस्युँ गाउँपालिका वडा ८ को मल्लेसिमा शुक्रबार राति पहिरो गएको हो । बस्तीबाट आएको पहिरोले १७ घर बगाएको स्थानीयले बताएका छन् ।

स्थानीयका अनुसार पहिरो बेपत्ता भएका दुई बालकको शव फेला परेको छ । तर पहिचान खुल्न सकेको छैन । त्यसैगरी पहिरोमा परी अन्य पाँच जना बेपत्ता भएका छन् । उनीहरुको गाउँहरुले खोजीकार्य भइरहेको छ ।

पानीले खोला बढेका कारण यो समाचार तयार पार्दासम्म प्रहरी घटनास्थल पुग्न सकेको छैन । केदारस्युँ गाउँपालिका वडा नम्वर ८ र ९ मा गण्डकी गाडले ठूलो क्षति गरेको छ ।

स्थानीयका अनुसार रातभरको पानी सँगै आएको पहिरोले केदारस्युँ ८ मा रहेको गण्डकी बजार पूर्णरूपमा विस्थापित भएको छ । एउटा मोबाइल पसल र एउटा खाद्यान्न पसल पनि बगाएको छ । दर्जनौं पानी घट्ट बगेका छन् ।