काठमाडौं । प्रधानमन्त्री केपी शर्मा ओलीको स्वास्थ्यमा सुधार भइरहेको त्रिवि शिक्षण अस्पताल मनमोहन कार्डियो भास्कुलर केन्द्रले जनाएको छ ।
‘एपेन्डिसाइटिस’ भएपछि गत मंगलबार बिहान अस्पताल भर्ना भएका प्रधानमन्त्री केपी शर्मा ओलीको सोही दिन अपरान्ह एपेन्डिसाइटिसको शल्यक्रिया गरिएको थियो ।
शल्यक्रियापछि प्रधानमन्त्री स्वास्थ्यमा उल्लेख्य सुधार भइरहेको उपचारमा संलग्न चिकित्सकहरुले जनाएका छन् । उनको स्वास्थ्य अवस्थाबारे चिन्ता व्यक्त गर्दै भारतीय प्रधानमन्त्री नरेन्द्र मोदी र भूटानी प्रधानमन्त्री डाक्टर लोटे छिरिङले पनि स्वास्थ्यलाभको कामना गरेका छन् ।
त्यसैगरी, नेकपाका अध्यक्ष पुष्पकमल दाहाल ‘प्रचण्ड’ र भरतपुर उपमहानगरपालिकाकी मेयर रेणु दाहालले आइतबार मनमोहन कार्डियो भास्कुलर केन्द्र त्रिवि शिक्षण अस्पताल पुगेर प्रधानमन्त्री ओलीसँग भेट गरी स्वास्थ्य अवस्थाबारे जानकारी लिएका छन् ।
स्वास्थ्यमा सुधार आएसंगै मृगौला प्रत्यारोपणको तयारीसमेत भइरहेको प्रधानमन्त्रीको सचिवालयले जनाएको छ ।
धेरैपटक डायलसिस भएकाले जतिसक्दो चांडो मृगौला प्रत्यारोपण गर्नुपर्ने चिकित्सकको सल्लाह छ ।
यस अघि सिंगापुरमा नियमित परिक्षण र उपचार गर्दै आएकाले मृगौला प्रत्यारोपण अमेरिका वा रुस कुन देश र कुन अस्पतालमा गर्ने ? भन्ने निक्र्यौल नभएको सचिवालयले जनाएको छ । त्यसैगरी, मृगौलादाताको पनि निधो नभएको सचिवालयले जानकारी दिएको छ ।
तर, चिकित्सकको सल्लाह र सहयोगमा जतिसक्दो छिट्टै मृगौला प्रत्यारोपण गर्ने तयारीमा चिकित्सकसहित सचिवालय लागि परेको छ । सचिवालयका अनुसार आगामी हप्ता मिर्गौला प्रत्यारोपणका लागि प्रधानमन्त्री देशबाहिर जाने तयारी हुँदैछ ।
