News Portal

  • हत्यामा पारिवारिक संलग्नता

    १९३ पटक

    काठमाडौं । मण्डन देउपुर नगरपालिका-६ सिपाघाटकी २५ वर्षिय सरिता दुलालको हत्यामा परिवारका अन्य सदस्यसमेतको संलग्नता रहेको प्रहरीको अनुसन्धानले देखाएको छ ।

    उनका श्रीमान सुदीपले सरिताको हत्या आफूले गरेको स्वीकारे पनि घटनाको प्रकृतिका आधारमा परिवारका अन्य सदस्यलाईसमेत हिरासतमा राखी अनुसन्धान भइरहेको जिल्ला प्रहरी कार्यालय धुलिखेलले जनाएको छ ।

    प्रहरीका अनुसार,‘अनुसन्धानबाट परिवारको अन्य सदस्यसमेतको संलग्नता देखिँदैछ, हिरासतमा राखी थप अनुसन्धान गर्दैछौँ ।’
    प्रहरीले सरिताका श्रीमान सुदीप, ससुरा पिताम्बर, सासु गङ्गा, जेठाजु केशव, जेठानी सङ्गीतालाई हिरासतमा राखी थप अनुसन्धान गर्न सोमबार १० दिनको म्याद थपेको छ । वैशाख १३ गते सरिता घाँटीमा नीलडाम भएको अवस्थामा मृत फेला पारेकी थिईन् ।

    अघिल्लो दिन राति हत्या भएको र भोलिपल्ट मात्रै परिवारले प्रहरीलाई खबर गरेको अनुसन्धानबाट खुलेको छ । उनको हत्यापछि श्रीमान सुदीप फरार अवस्थामा रहनु, भुइँतलामा बस्दै आएकी सरिताको घाँटीमा डोरीले कसेको नीलडामसहितको शव माथिल्लो तलामा भेटिनु, बिहान १० बजे मात्रै घरका अन्य व्यक्तिले सरिता मृतक अवस्थामा भेटिएको भनी प्रहरीलाई खबर गर्नुले कर्तव्य गरी मारेको हुन सक्ने जनाउँदै मृतकका दाजु मण्डन देउपुर नपा-४ चैनपुरका कृष्णप्रसाद दाहालले वैशाख १३ गते नै प्रहरीमा जाहेरी दर्ता गरेका थिए ।

    प्रहरीले जाहेरीका आधारमा सोही दिन गाउँ छाडेर भाग्ने तरखरमा रहेका श्रीमान सुदीप तथा परिवारका अन्य सदस्यलाई गिरफ्तार गरेको थियो ।

    घटनाको प्रकृति शंकास्पद देखिएपछि प्रहरीले शिक्षण अस्पताल काठमाडौंमा मृतकको शव परीक्षण गराएको छ । परीक्षण रिपोर्टले पनि श्रीमान एक्लैबाट सरिताको हत्या नभएको देखाएको प्रहरीले जनाएको छ । उनको रहस्यमय मृत्यु भएको जनाउँदै स्थानीय महिलाले वैशाख १७ गते जिल्ला प्रहरी कार्यालय धुलिखेलमा दबाबपूर्ण प्रदर्शन गरी सत्यतथ्य छानबिनको माग गरेका थिए ।

    स्थानीयका अनुसार ४ वर्षअघि सरितासँग विवाह गरेका सुदीप दुई वर्षदेखि मानसिक रोगी थिए । सुदीप र सरिता बाबुआमासँगै एउटै घरको भुइँतलामा बसेको भए पनि खाना भने अलग्गै खाँदै आएका थिए ।

    प्रतिकृया दिनुहोस्