News Portal

  • सुरक्षाकर्मीकै मिलेमतोमा तस्करी बढ्यो, स्थानीय तहका केही जनप्रतिनिधिहरु पनि संलग्न

    ४०८ पटक

    काठमाडौं । पश्चिम नवलपरासीका विभिन्न नाकाबाट तस्करी बढ्दै गएको छ ।

    भारतबाट नेपालतर्फ आउने र नेपालबाट भारततर्फ जाने विभिन्न सामाग्रीहरुको तस्करी बढ्दै गएको भन्सारकै कर्मचारीले स्वीकार गरेका छन् ।

    सीमाना जोडिएका महेशपुर, बिष्णुपुरा, भूजहवा, गुठिप्रसौनीलगायतका नाकाबाट दुवै देशतर्फ सामानहरु तस्करी हुने गरेको छ ।

    तस्करी कार्यमा सुरक्षाकर्मीकै मिलमतो हुने गरेकाले राजस्व संकलन प्रभावित भएको भन्सार कार्यालयले जनाएको छ । पछिल्लो पटक नेपालबाट मटर, मरिच र सुपारी भारततर्फ तस्करी हुने गरेको छ भने भारतबाट आउने लत्ता कपडा, मेसिनरी सामान र कुखुराका चल्ला तस्करी हुने गरेको छ ।

    सीमा नाकाबाट दैनिक २ देखि ३ ट्रकसम्म भारततर्फ मटर तस्करी हुने गरेको बताइएको छ । वीरगन्ज र भैरहवाबाट ल्याइने मटरलाई व्यवसायीले नाकाहरुमा गोदाम बनाएर राख्ने गरेका छन् ।

    सोही गोदामबाट साइकल र मोटरसाइकलमा राखेर मटर, सुपारी र मरिच भारततर्फ पठाउने गरिएको छ । तस्करी कार्यमा स्थानीय तहका केही जनप्रतिनिधिहरुको पनि संलग्नता रहेको बताइएके छ ।

    सीमा नाकामा सशस्त्र प्रहरी र नेपाल प्रहरीका सीमा चौकी, पोष्ट र विभिन्न स्थानमा चेक पोष्टहरु राखिएको र दुवै सुरक्षा निकायले सवारीसाधन र पैदल गस्ती परिचालन गरेको जनाएका छन् । तर तस्करी कार्यमा भने कमी आउन सकेको छैन ।

    पछिल्लो पटक नाकाहरुमा मटर तस्करी बढेको गुनासो आएपछि निगरानी बढाइएको छ । प्रमुख नाकाभन्दा पनि सहायक र गल्लीजस्तो बाटोबाट तस्करी हुने गरेकाले त्यसतर्फ पनि निगरानी बढाइएको जिल्ला प्रहरी कार्यालय नवलपरासीले जनाएको छ ।

    प्रतिकृया दिनुहोस्