अनलाइन डबली
काठमाडौँ । अखिल नेपाल किसान महासंघ (क्रान्तिकारी केन्द्र) ले उखु किसानका माग पूरा नगरे सरकारविरुद्ध संघर्षमा उत्रिने चेतावनी दिएको छ ।
महासंघका अध्यक्ष चित्रबहादुर श्रेष्ठले सोमबार एक विज्ञप्ति जारी गरेर काठमाडौँमा सञ्चालित उखु किसानहरूको संघर्षमा महासंघको तर्फबाट ऐक्यबद्धता जाहेर गर्दै उखु किसानहरूको कटौती गरिएको ५० प्रतिशत अनुदान पुनस्र्थापित गर्न, किसानहरूले प्राप्त गर्नुपर्ने अनुदान बापतको रकम तत्काल भुक्तानी गर्न, उखुको न्यूनतम् समर्थन मूल्य प्रतिक्विन्टल कम्तीमा एकहजार रूपैयाँ तोक्नुपर्नेमा बताएको छ ।
“नेपाली उखु उत्पादक किसानहरूलाई आवश्यक उच्च उत्पादन दिने, रोगकीरा प्रतिरोधी तथा चिनीको मात्रा बढी भएका नयाँ जातका बिउ, तालिम–प्रशिक्षण, सेवा–सुविधा, बिमा, अनुदान र सहुलियत ब्याजदरको ऋणसहित प्रोत्साहित गर्न, किसानहरूको सहभागितामा बिरगञ्ज चिनी कारखाना र लुम्बिनी चिनी कारखाना सञ्चालन गरी देशलाई उखु र चिनी उत्पादनमा आत्मनिर्भर बनाउँदै रोजगारीका अवसर सिर्जना गर्न जोडदार माग गर्दछौँ । यी मागहरू पूरा नगरी उखु किसानहरूलाई दबाउने कोशिस गरिएमा सरकारविरुद्ध संघर्षमा उत्रनुको कुनै विकल्प नरहने कुरा पनि यही प्रेस विज्ञप्तिमार्फत सार्वजनिक गर्न चाहन्छौँ । साथै, देशभरका उखु उत्पादक किसानहरूलाई श्रमजीवी उखु किसानहरूको एकमात्र क्रान्तिकारी संगठन अखिल नेपाल उखु उत्पादक किसान संघ (क्रान्तिकारी)मा गोलबन्द हुन हार्दिक अनुरोध गर्दछौँ” जारी विज्ञप्तिमा उल्लेख गरिएको छ ।
तीजको बेलामा एमाले–काँग्रेसको अपवित्र गठबन्धनबाट सरकारले उखु किसान विरोधी हर्कतका कारण हाम्रो देशका उखु किसानहरू आफ्नो हक, हित र अधिकारका लागि संघर्ष गर्न काठमाडौँका सडकमा नारा–जुलुश गर्नुपर्ने बाध्यता सिर्जना भएको बताएको समेत अध्यक्ष श्रेष्ठले बताएका छन् । उनले दलाल र विचौलियाको संरक्षण गर्न बनेको ओली सरकारले उखु किसानहरूले विगतदेखि प्राप्त गर्दै आएको अनुदान ५० प्रतिशत कटौती गरेको बताए ।
यस्तो छ विज्ञप्तिः
नेपालका श्रमजीवी किसानहरूको एकमात्र आशा र भरोसाको केन्द्रको रूपमा रहेको हाम्रो महान् तथा गौरवशाली संगठन अखिल नेपाल किसान महासंघ (क्रान्तिकारी केन्द्र)को तर्फबाट नेपालीहरूका महान् चाडहरू – दर खाने पर्व, हरितालिका तीज र ऋषि पञ्चमी – को अवसरमा देशभरका सम्पूर्ण महिला किसानहरूसहित सम्पूर्ण श्रमजीवी महिलाहरू र आम जनसमुदायमा हार्दिक शुभकामना व्यक्त गर्दछौँ । यस पर्वले सम्पूर्ण श्रमजीवी महिलाहरूलाई न्याय, समानता, स्वतन्त्रता र स्वाभिमानी जीवनका लागि संघर्ष गर्दै शान्ति, समृद्धि तथा समाजवादको दिशामा अग्रसर हुने प्रेरणा प्रदान गरोस् भन्ने शुभकामना व्यक्त गर्दछौँ ।
नेपालमा तीजपर्व माइतीले चेलीहरूलाई लिन जाने, चेलीहरू माइत आउने र आफ्ना सम्पूर्ण पीरमर्का बिर्सेर छमछमी नाच्ने पर्वको रूपमा मनाइन्छ । यस्तो छोरी-चेलीलाई माइतीमा बोलाएर दर ख्वाउनुपर्ने चाडको बेलामा एमाले-काँग्रेसको अपवित्र गठबन्धनबाट बनेको किसानमारा ओली सरकारको उखु किसान विरोधी हर्कतका कारण हाम्रो देशका उखु किसानहरू आफ्नो हक, हित र अधिकारका लागि संघर्ष गर्न काठमाडौँका सडकमा नारा-जुलुश गर्नुपर्ने बाध्यता सिर्जना भएको छ । दलाल र विचौलियाको संरक्षण गर्न बनेको ओली सरकारले उखु किसानहरूले विगतदेखि प्राप्त गर्दै आएको अनुदान ५० प्रतिशत कटौती गरेको छ भने किसानहरूले अघिल्लो वर्षको उखु खेतीको अनुदानस्वरूप प्राप्त गर्नुपर्ने करिब १ अरब ५० करोड रूपैयाँ भन्दा बढी रकम हालसम्म पनि भुक्तानी गरेको छैन । ओली सरकार आएपछि सम्पूर्ण उपभोग्य वस्तुको महंगीले सीमा नाघेको छ तर अघिल्लो वर्ष किसानहरूको उखुको न्युनतम् समर्थन मूल्य अत्यन्तै कम तोकिएको थियो । हामी ओली सरकारका उखु किसानहरूलाई निरुत्साहित गर्दै नेपाली उखु खेती तथा चिनी उद्योग ध्वस्त गर्ने र विदेशी उखु तथा चिनी आयात गरी कमिशन खाने प्रपन्चसहितका सम्पूर्ण किसान विरोधी हर्कतहरूको घोर निन्दा तथा भर्त्सना गर्दछौँ ।
काठमाडौँमा सञ्चालित उखु किसानहरूको संघर्षमा अखिल नेपाल किसान महासंघ (क्रान्तिकारी केन्द्र)को तर्फबाट हार्दिक ऐक्यबद्धता जाहेर गर्दै उखु किसानहरूको कटौती गरिएको ५० प्रतिशत अनुदान पुनर्स्थापित गर्न, किसानहरूले प्राप्त गर्नुपर्ने अनुदान बापतको रकम तत्काल भुक्तानी गर्न, उखुको न्यूनतम् समर्थन मूल्य प्रतिक्विन्टल कम्तीमा रु १,०००/- (अक्षरेपी एकहजार रूपैयाँ) तोक्न, नेपाली उखु उत्पादक किसानहरूलाई आवश्यक उच्च उत्पादन दिने, रोगकीरा प्रतिरोधी तथा चिनीको मात्रा बढी भएका नयाँ जातका बिउ, तालिम-प्रशिक्षण, सेवा-सुविधा, बिमा, अनुदान र सहुलियत ब्याजदरको ऋणसहित प्रोत्साहित गर्न, किसानहरूको सहभागितामा बिरगञ्ज चिनी कारखाना र लुम्बिनी चिनी कारखाना सञ्चालन गरी देशलाई उखु र चिनी उत्पादनमा आत्मनिर्भर बनाउँदै रोजगारीका अवसर सिर्जना गर्न जोडदार माग गर्दछौँ । यी मागहरू पूरा नगरी उखु किसानहरूलाई दबाउने कोशिस गरिएमा सरकारविरुद्ध संघर्षमा उत्रनुको कुनै विकल्प नरहने कुरा पनि यही प्रेस विज्ञप्तिमार्फत सार्वजनिक गर्न चाहन्छौँ । साथै, देशभरका उखु उत्पादक किसानहरूलाई श्रमजीवी उखु किसानहरूको एकमात्र क्रान्तिकारी संगठन अखिल नेपाल उखु उत्पादक किसान संघ (क्रान्तिकारी)मा गोलबन्द हुन हार्दिक अनुरोध गर्दछौँ ।
