अनलाइन डबली
काठमाडौँ । पछिल्लो पटक निकै विवादित र बिथितिको घर बन्दै गएको नेपाल स्काउटका निर्देशक रामप्रसाद भट्टराईले मनपरीतन्त्र चलाउँदै आएको तथ्य फेला परेको छ ।
नेपाल स्काउट निमावलीले तोकेभन्दा विभिन्न शिर्षकमा गरी निर्देशक भट्टराईले दश गुणाबढी रकम मासिक कुम्ल्याउँदै आएका छन् । यतिसम्मकी भट्टराईले ०२८ च ९६२४ नम्बरको इलेक्ट्रीक गाडी चढ्छन् तर मासिकरुपमा फ्युल र मोबिलको रकम बुझ्दै आएका छन् । यतिमात्रै होइन, गाडी आफै चलाउछन् तर ड्राइभरको मासिक तलब पनि आफै बुझ्छन् ।
नेपाल स्काउटका एक कर्मचारीले अनलाइन डबलीलाई दिएको जानकारीअनुसार भट्टराईले फ्युल शिर्षकमा मासिक १७ हजार १ सय, मोबिलको १ हजार १६६ रुपैयाँ बुझ्दै आएका छन् । त्यस्तै, गाडी आफै चलाउछन् तर ड्राईभरको तलब भन्दै ३३ हजार ३३९ रुपैयाँ मासिक बुझ्दै आएका छन् ।
नेपाल स्काउट निमावलीको दफा ७.४ (क) मा निर्देशकको काम, कर्तव्य र अधिकारको व्यवस्था गरेको छ । जसको १० नम्बर बुँदामा निर्देशकले मासिक तलब १६ हजार ५० रुपैयाँ पाउने व्यवस्था गरिएको छ । तर, भट्टराईले ५६ हजार ७८७ रुपैयाँ तलब, ग्रेड ५ हजार ६७९ गरी मासिक ६४ हजार ४६६ रुपैयाँ बुझ्दै आएका छन् । त्यस्तै, सामाजिक सुरक्षा कोषको लागि मासिक १२ हजार ४९३.२ रुपैयाँ पनि बुझेको कार्यालयको रेकर्डमा उल्लेख छ ।
स्वयम्सेवी संस्था भएकोले निर्देशकलाई निश्चित पारिश्रमिक तोकिएको एक अधिकारीले बताए । तर, उक्त निमावलीलाई धोती लाउँदै भट्टराईले आफूलाई पुग्नेगरी तलब खाइरहेका छन् । यो सरासर अख्तियारको दुरुपयोग ती कर्मचारीले बताए । भट्टराईले २०६६ असोज ८ गते निर्देशकको लागि भन्दै आवेदन फारम भरेका थिए । उनले हालसम्म यही तलब बुझ्दै आएको बताइएको छ ।
निर्देशकमा नियुक्ति पाएपछि भट्टराईले संस्थालाई एकपछि अर्को भारमाथि भार थप्दै आएका छन् । ‘उहाँ निर्देशक भएपछि संस्थाको ओरोलो र कुशासनको यात्रा सुरु भएको हो, अहिलेसम्म जारी छ, कहिलेसम्म मनपरीतन्त्र चल्ने हो थाहा छैन’ स्काउटका एक आयुक्तले भने । उनले यो सरासर अख्तियारको दुरुपयोग भएको बताए ।
भट्टराईले शक्तिकेन्द्रलाई खुशी पार्न माहिर मानिन्छन् । शक्तिकेन्द्रलाई प्रभावमा पार्ने र आफूलाई अनुकुल नभए प्रमुख आयुक्त र आयुक्तलाई विभिन्न आरोप लगाउँदै असहयोग गर्दै आएका छन् । जसका कारण संस्थामाथि प्रश्न उठ्दै आएको छ ।
