अनलाइन डबली
काठमाडौँ । राष्ट्रिय स्वतन्त्र पार्टीका सभापति रवि लामिछानेलाई थप ४ दिन हिरासतमा राख्न अनुमति दिएको छ । पूर्वउपप्रधानमन्त्री समेत रहेका लामिछानेलाई अनुसन्धान गर्न जिल्ला अदालत कास्कीले अनुमति दिएको हो ।
मंगलबार न्यायाधीश हिमलाल बेलबासेको इजलासले लामिछानेसहित छविलाल जोशी, लिला पछाई, रामबहादुर खनाल र कृष्णबहादुर गुरुङलाई हिरासतमा राख्न म्याद थप गरेको छ ।
लामिछानेलाई म्याद थप गरेको यो ८ औं पटक हो । प्रहरीले लामिछानोलई संगठित रुपमा सहकारी ठगी, सम्पत्ति शुद्धीकरणसम्बन्धी कसुरमा हिरासतमा राखेर अनुसन्धान गरिरहेको छ ।
लामिछानेलाई प्रहरीले काठमाडौँबाट कात्तिक २ मा पक्राउ गरेर कास्की पुर्याएको छ । त्यसअघि सोही मुद्दामा पक्राउ परेका छबिलाल जोशी पक्राउ परेको दिनलाई आधार मानेर सम्पत्ति शुद्धीकरणको कसुरमा ९० दिन हिरासतमा राखेर अनुसन्धान गरिरहेको छ ।
प्रहरीले थुनामा राख्न पाएको सुविधा यो अन्तिम हो ।
लामिछानेलाई थप दुःख दिन अब प्रहरीले पाँचै जिल्ला पुर्याएर थुनछेक गराउन लागेको रास्वपाका नेताहरुले आरोप लगाइरहेका छन् ।
जिल्ला प्रहरी कार्यालय कास्कीले सोमबार सूर्यदर्शन सहकारी ठगी प्रकरणको अनुसन्धान प्रतिवेदन जिल्ला सरकारी वकिल कार्यालय कास्कीलाई बुझाएको छ ।
