ललितपुर महानगरले  हरिहर भवनस्थित राष्ट्रिय सहकारी विकास बोर्ड भवनमा अनधिकृत रुपमा बनाइएको पर्खाल भत्काएको छ।

जिल्ला अदालत, उच्च अदालत र सर्वोच्च अदालतले समेत सो पर्खाल अनधिकृत रुपमा बनाएको फैसला सुनाएपछि ललितपुर महानगरपालिका नगर प्रहरी वलले आइतबार बिहान डोजरले सो भवनको सडकतिरको पर्खाल भत्काएको हो।

अनधिकृत रुपमा बनाइएको सो भवनको पर्खाल सर्वोच्च अदालतले २०७३ साल पुस १८ गते भत्काउने आदेश दिएपछि आज नगर प्रहरीले डोजर चलाएर भत्काइएको नगर प्रहरी प्रमुख सीताराम हाछेथूले जानकारी दिए।

स्थानीयवासीले सो बोर्ड भवनले आफूहरूको घर जाने सडक समेत मिचेर निर्माण गरेको संरचना  भत्काउन निवेदन गरेका थिए ।