अनलाइन डबली
काठमाडौँ । आजबाट तिहार सुरु भएको छ । आजै त्रयोदशी तिथि लाग्ने भएकाले प्रत्येक वर्ष कार्तिक कृष्ण त्रयोदशीदेखि सुरु हुने हिन्दूहरुको दोस्रो ठूलो चाड यमपञ्चक अर्थात् तिहार तिहार सुरु भएको हो ।
नेपाल पञ्चाङ्ग निर्णायक विकास समितिका अनुसार आज बिहान ११ः०१ बजेपछि कार्तिक कृष्ण त्रयोदशी तिथि परेकाले आज धनतेरस अर्थात् धनत्रयोदशी पर्व मनाउनुपर्ने चलन छ ।
समितिका अनुसार यमदीपदान भने भोलि अर्थात् बुधबारदेखि सुरु हुनेछ । समितिका अध्यक्ष प्रा श्रीकृष्ण अधिकारीले काग तिहार पनि कात्तिक १४ गते बुधबार नै परेको बताउँछन् । बिहान त्रयोदशी परेका दिन धनतेरस अर्थात् धनत्रयोदशी र बेलुकी त्रयोदशी तिथि परेका दिन यमदीपदान सुरु हुने शास्त्रीय नियम रहेको छ ।
धनवन्तरी जयन्ती पनि कात्तिक १४ गते बुधबार परेको भने बिहीबार कुकुर तिहार र लक्ष्मीपूजा एकैदिन परेको समितिले जनाएको छ ।
त्यसैगरी कात्तिक १५ गते दिउँसो १५ः१४ बजेसम्म चतुर्दशी र त्यसपछि औँसी तिथि लाग्ने भएकाले लक्ष्मीपूजा पनि यसै दिन गर्नुपरेको छ ।कात्तिक १६ गते शुक्रबार औँसी तिथि बेलुकी १७ः१५ बजेसम्म परेको छ ।
गाईगोरुपूजा कात्तिक १७ गते शनिबार परेको छ । हलितिहार, गोवर्द्धन पूजा, बलीपूजा र आत्म (म्ह) पूजा कात्तिक पनि यसैदिन परेको छ । कार्तिक शुक्ल प्रतिपदाका दिन गाई, गोरु, गोवद्र्धन र आत्म (म्ह) पूजा गर्नुपर्ने शास्त्रीय वचन रहेको छ । प्रतिपदाका दिन सूर्योदय भएकै दिन नयाँ वर्ष मनाउनुपर्ने शास्त्रीय वचनअनुसार नेपाल संवत् ११४५ पनि यसै दिनदेखि सुरु हुन्छ ।
तिहारको मुख्य दिनको रुपमा रहेको भाइटीका कात्तिक १८ गते ११ः३७ बजे शुभ साइत रहेको समितिले जनाएको छ । योसँगै तिहार सकिनेछ ।
