अनलाइन डबली
काठमाडौं । अबिरल बर्षासँगै आएको पहिरोका कारण देशभरको सडक संजाल प्रभावित भएको छ । पोखरा जोड्ने सबै मार्गहरु पहिरोका कारण अवरुद्ध भएका छन् ।
त्यसैगरी अविरल वर्षापछि आएकाे पहिराेकाे कारण हेटौंडाबाट काठमाडौं जोडने छोटा मार्गहरु बन्द भएका छ्न् । हेटौंडा- सिस्नेरी- दक्षिणकाली सडक, कान्तिलोकपथ, हेटौंडा चखेल- मातातिर्थ सडक खण्डका ठाउँठाउँमा पहिरोका कारण बन्द भएको छ ।
दक्षिणकाली सडकखण्ड अन्तर्गत मकवानपुरको इन्द्रसरोबर गाउँपालिका वडा नम्बर २ छेपारेमा वर्षाको कारण सडक माथिबाट पहिरो आई बाटो पुर्णरुपमा अवरुद्ध भएको छ । यस्तै सिस्नेरी सडकखण्डको विभिन्न स्थानमा पहिरो खस्दा बाटो अवरुद्ध छ ।
मकवानपुरको इन्द्रसरोवर–५ महालक्ष्मी खोला नजिक पहिरो खस्दा मातातीर्थ, चखेल सडक खण्ड अवरुद्ध भएको छ । अहिलेपनि वर्षा भइरहेकोले सडख खुलाउन सकिएको छैन ।
त्यसैगरी कान्तिलोकपथ अन्तरगत मकवानपुर तथा ललितपुरको विभिन्न स्थानमा पहिरो जादा सडक अवरुद्ध भएको प्रहरीको भनाई छ ।
मध्यपहाडी र वीपी लोक मार्ग पनि ठाउँठाउँमा आएको पहिरोका कारण अवरुद्ध भएको छ ।
यात्रामा रहेका यात्रुहरु अलपत्र परेका छन् भने यातायात प्रभावित भएको छ ।
