काठमाडौं । प्रमुख प्रतिपक्षी नेपाली कांग्रेसका सांसदहरूले प्रतिनिधि सभा बैठकमा नाराबाजी गरेका छन् । बजेट अधिवेशनको पहिलो दिनमा नै काँग्रेसले नाराबाजी गर्दै काँग्रेसले यसअघिको मागलाई नछोड्ने भन्दै संसद बैठक अवरुध गरेको हो ।

बैठक सुरु हुने बितिक्कै काँग्रेस सांसदहरुले आ–आफ्नो स्थानमा उभिएर संसदीय छानबिन समिति गठन गर, सहकारी पीडितहरूलाई न्याय दे भनेर नाराबाजी गरेका थिए ।

त्यसअघि समय लिएर बोलेका कांग्रेस महामन्त्री गगनकुमार थापाले संसदीय समिति गठन नगर्दासम्म संसद्को कामकारबाही अगाडि नबढ्ने बताएका थिए । संसद्‌मा प्रश्नहरूको घाँटी निमोठ्ने तयारी गरेको भन्दै उनले चेतावनीपूर्ण भाषामा भने, ‘जे गर्न सोच राखिएको छ, यसको मूल्य सबैले चुकाउनुपर्छ ।’

काँग्रेसको यो अडानले सरकारलाई नीति तथा कार्यक्रम र बजेट ल्याउन समस्या पार्ने देखिएको छ ।