अनलाइन डबली
काठमाडौं । जल तथा मौसम पूर्वानुमान महाशाखाले आज देशका धेरै स्थानमा वर्षा हुनुको साथै कोशी, मधेश, बागमती, गण्डकी, लुम्बिनी र सुदूरपश्चिम प्रदेशका केही स्थानमा भारी वर्षाको सम्भावना रहेको जनाएको छ।
मनसुनको न्यूनचापीय रेखा नेपाल नजिकै सरेकाले आज दिउँसोदेखि अझै धेरै पानी पर्ने पूर्वानुमान छ । पानी पर्ने क्रम सोमबारसम्मै जारी रहने मौसम विभागले उल्लेख गरेको छ ।
हाल देशभर सामान्य देखि मौसम पूर्ण बदली रहेको छ । रातीदेखि नै बागमती प्रदेशको काठमाडौं उपत्यका सहित गण्डकी, लुम्बिनी र कर्णाली प्रदेशका थोरै तथा बाँकी प्रदेशका एक–दुई स्थानहरूमा हल्का देखि मध्यम वर्षा भइरहेको महाशाखाले उल्लेख गरेको छ ।
शनिबार दिउँसो देशभर सामान्य देखि मौसम पूर्ण बदली रहनेछ।
कोशी, मधेश, बागमती, गण्डकी, लुम्बिनी र सुदूरपश्चिम प्रदेशका एक–दुई स्थानमा मेघ गर्जन सहित भारी वर्षाको सम्भावना रहेको जनाउँदै विभागले सर्तकता अपनाउन आग्रह गरेको छ ।
विभागका अनुसार राति देशभर सामान्यदेखि पूर्ण बदली रहनेछ । देशका धेरै स्थानहरूमा हल्का देखि मध्यम वर्षाको सम्भावना रहेको छ। साथै कोशी, मधेश, बागमती, गण्डकी, लुम्बिनी प्रदेशका थोरै स्थानहरू र बाँकी प्रदेशका एक–दुई स्थानमा मेघ गर्जन र चट्याङ्ग सहित भारी देखि धेरै भारी वर्षाको समेत सम्भावना रहेको छ ।
वर्षाले जनस्वास्थ्य, कृषि, दैनिक जनजीवन, सडक तथा हवाई यातायात प्रभावित हुनसक्ने भन्दै विभागले सतर्क रहन आग्रह गरेको छ ।
पछिल्लो चौविस घण्टामा सबैभन्दा धेरै वर्षा दोलखाको जिरीमा भएको छ । त्यहाँ १२१ दशमलव ८ मिलिमिटर वर्षा मापन भएको छ ।
यस्तै,लुम्लेमा ४३ दशमलव ६,धरानमा ४१ दशमलव २,नेपालगञ्जमा ९ दशमलव ८,पोखरामा ३ दशमलव ४ र काठमाडौंमा २ दशमलव २ मिलमिटर वर्षा मापन भएको छ ।
