काठमाडौं । सरकारले दुई जनाको नेपाली नागरिकता रद्द गरेको छ । झुटो विवरण पेशी वंशजको आधारमा नेपाली नागरिकता लिएको पुष्टि भएपछि रद्द गरिएको सरकारका प्रवक्ता रेखा शर्माले जानकारी दिएकी छन् ।

गृह मन्त्रालयका प्रस्तावमा पर्साबाट वंशजका आधारमा नागरिकता लिएका अमन चौधरी अग्रवाल र कास्कीबाट सोफिया रुथ भण्डारीको नागरिकता रद्द गर्ने निर्णय गरिएको मन्त्री शर्माले जानकारी दिइन् ।

भारतीय नागरिक अग्रवालले झुटो विवरण पेश गरेर जिल्ला प्रशासन पर्साबाट २०७७ कात्तिक २५ गते नागरिकता प्राप्त गरेका थिए । उनलाई नेपाली नागरिकको सूचीबाट हटाउने र संलग्नलाई कारवाही गर्ने निर्णय समेत सरकारले गरेको छ ।

त्यस्तै, जिल्ला प्रशासन कार्यालय, कास्कीबाट सोफिया रुथ भण्डारीले लिएको वंशजको नागरिकता पनि मन्त्रिपरिषद्ले रद्द गरेको छ । भण्डारीले पनि झुटो विवरण पेश गरी नेपाली नागरिकता दिएका थिए ।