अनलाइन डबली
काठमाडौं । विनोद शाहीको हत्याका मुख्य आरोपी सर्जन बहादुर शाहाी पक्राउ परेका छन् । अछाम पञ्चदेवल विनायक नगरपालिका–४ का स्थानीय विनोद शाही गएको जेठ २१ गते विहान शव फेला परेको थियो ।
स्थानीय तहको चुनावको विषयलाई जेठ १७ गते साँझ कांग्रेस र एमालेका कार्यकर्ताबीच विवाद भएको थियो । सामान्य विवादलाई लिएर नगरप्रमुख अम्बिका चलाउनेले गाउँमा प्रहरी पठाएर बालबालिका र महिलामाथि कुटपिट भएपछि घटनाले उग्ररुप लिएको थियो ।
पीडितले शाही र मेयर चलाउनेसहित १३ जनाविरुद्ध किटानी जाहेरी दिएका थिए । त्यसपछि शाही प्रहरीको फरार सूचीमा थिए । प्रहरीका अनुसार सोमबार साँझ शाहीलाई काठमाडौंको धापासीबाट पक्राउ गरिएको हो । शाहीलाई महाराजगञ्ज प्रहरी वृत्तमा राखिएको छ ।
पीडितले दोषीलाई कारवाहीको माग गर्दै पटकपटक विरोध प्रदर्शन गरिरहेका थिए । अछामबाट काठमाडौँ आएका मृतकका परिवारको सहयोगमा प्रहरीले शाहीलाई पक्राउ गरेको हो ।
शाही १५ वर्षीय विनोदको हत्याका मुख्य योजनाकार रहेको पीडितले दाबी गर्दै आएका छन् । मेयर चलाउनेलाई तत्कालिन गृहमन्त्री बालकृष्ण खाँण र सरकारी वकिलले सेटिङमा उन्मुक्ति दिइएको आरोप पीडित परिवारको छ ।
जनयुद्धको क्रममा माओवादी कार्यकर्ता सूर्य शाहीको पनि हत्या गरेको आरोप शाहीमाथि छ । सर्जन शाहीकै योजनामा सूर्यलाई बोरामा हालेर कर्णाली नदीमा फालेको आफन्त बताउँछन् ।
