अनलाइन डबली
काठमाडौं । अमेरिकाका सहायक विदेशमन्त्री डोनाल्ड लु आज नेपाल आउँदैछन् । दक्षिण तथा मध्य एसिया हेर्ने लु एक दिने नेपाल भ्रमणको क्रममा नेपाल आउन लागेका हुन् ।
सहायक विदेशमन्त्री लुले प्रधानमन्त्री प्रचण्ड र परराष्ट्रमन्त्री एनपी साउदसँग शिष्टाचार भेटवार्ता गर्ने कार्यक्रम तय भएको छ । भेटको क्रममा लुले पाँच सय मिलियन अमेरिकी डलर अनुदानको एमसीसी परियोजना कार्यान्वयनको अवस्था, दुई देशबीचको सम्बन्धलगायत विषयमा कुराकानी गर्ने तयारी छ ।
लु एमसीसी संसदबाट अनुमोदन भएपछि नेपाल आउने अमेरिकी उच्च अधिकारी हुन् । उनी एमसीसी अनुमोदन हुन चार महिना पहिले पनि नेपाल आएका थिए । एमसीसीबारे नेपालमा तीब्र रुपमा दुई मत थियो । तत्कालिन सत्तारुढ दलभित्रै पनि दुई मत थियो । त्यही बेला लु नेपाल आएका थिए ।
पहिलो भ्रमणको मिसन एमसीसी नेपालमा जसरी पनि लागु गर्ने रहेको थियो भने अहिले त्यसलाई विना अवरोध अगाडि बढाउने वातावरण बनाउनु रहेको बताइएको छ ।
