अनलाइन डबली
काठमाडौं । आज भानु जयन्ती विभिन्न कार्यक्रम गरी मनाइँदैछ । भानु जयन्तीको अवसरमा आज प्रभातफेरि, प्रवचन, पुरस्कार वितरण लगायतका कार्यक्रम आयोजना गरिएको छ ।
आदिकवि भानुभक्त आचार्य तनहुँको भानु नगरपालिका–४ चुँदीरम्घामा विक्रम संवत् १८७१ असार २९ गते जन्मिएका थिए । उनको वि. सं. १९२५ असोज ६ गते निधन भएको थियो । यो नगरपालिकाको नाम पनि उनकै नामबाट राखिएको हो ।
भानु जयन्तीको अबसरमा गण्डकी प्रदेश सरकारले यही अवसरमा शुक्रवार सार्वजनिक बिदा दिएको छ ।
प्रदेश मन्त्रिपरिषद्को २०७९ चैत ८ गतेको निर्णयअनुसार प्रदेश राजपत्रमा प्रकाशित सार्वजनिक बिदा सम्बन्धी सूचनाबमोजिम भानुजयन्तीका अवसरमा शुक्रवार बिदा दिइएको छ ।
नेपाली साहित्यका प्राथमिककालका प्रतिनिधि कविका रूपमा परिचित भानुभक्त वाल्मीकि रामायणका अनुवादकका रूपमा प्रख्यात छन् । मोतीराम भट्टले उनलाई पहिलोपटक नेपाली भाषाका आदिकवि उपाधि दिएका थिए ।
भानुभक्तले प्रश्नोत्तर, भक्तमाला, बधुशिक्षा लगायतका कृति लेखेका छन् । उनका पाण्डुलिपिलाई प्रकाशन गर्न मोतिराम भट्टले महत्वपूर्ण भूमिका खेलेका थिए ।
