अनलाइन डबली
काठमाडौं । उपप्रधान तथा गृहमन्त्री नारायणकाजी श्रेष्ठले निर्दोस तर्सनु नपर्ने बताउँदै दोषीलाई कुनै छुट नहुने बताएका छन् । श्रेष्ठले सामाजिक संजालमा कानुन मिच्दै देश र जनताको हित विरुद्ध आफ्नो व्यक्तिगत फाइदाको लागि किर्ते, ठगी, भ्रष्टाचार, संगठित अपराध र राज्यद्रोहमा संलग्नबाहेक निर्दोष कोही तर्सनु नपर्ने बताएका हुन् ।
‘कानुन मिच्दै देश र जनताको हितविरुद्ध आफ्नो ब्यक्तिगत फाइदाको लागि किर्ते, ठगी, भ्रष्टाचार, संगठित अपराध र राज्यद्रोहमा संलग्नबाहेक निर्दोष कोहि तर्सनु पर्दैन । दोषी र अपराधीलाई भने छुट हुनेछैन । अनि धनी र गरिब,सम्पन्न र नबिपन्नलाई छुट्टा छुट्टै कानुन हुन सक्दैन ।त्यस्तो अपेक्षा नगरौं’ श्रेष्ठले फेसबुकमा लेखेका छन् ।
हिजो दिउँसो मिटरब्याज पीडितको विरोध प्रदर्शनकारीलाई सम्बोधन गर्दै अध्यादेश निष्क्रिय भए पनि मिटरब्याज पीडितलाई न्याय दिलाएरै छाड्ने प्रतिवद्धता जाहेर गरेका थिए ।
धर्नास्थल नयाँ बानेश्वरमा पुगेका उपप्रधानमन्त्री श्रेष्ठले अध्यादेश निष्क्रिय भए पनि संसदमा रहेको भन्दै आयोगमार्फत मिटरब्याज पीडितलाई न्याय दिने काम नरोकिने बताउँदै सरकारले अध्यादेश आउनुभन्दा अगाडि आयोग बनाएर काम गरिरहेकाले ढुक्क हुन पीडितलाई श्रेष्ठले आग्रह गरे ।
उपप्रधानमन्त्री श्रेष्ठले मिटरब्याज पीडितले आयोगमा दिएका २५ सय वटा उजुरीमा छानबिन गरेर १५ सय वटा उजुरीमा न्याय दिलाउने गरी पीडितको पक्षमा फैसला भएको बताए ।
