अनलाइन डबली
काठमाडौं । नक्कली भुटानी शरणार्थी प्रकरणका आरोपीलाई निर्दोष दाबी गर्दै नाम चलेका अधिवक्ताहरुले बहस गरे । उनीहरुले संविधान र कानुनका हरेक धारा पल्टाउँदै दोषीलाई निर्दोष सावित गर्न प्रयास गरे ।
पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँणको पक्षमा बहस गर्ने अधिवक्ताहरुले सामान्य नभएर धरौटीमा छुटाउन निकै बहस गरेका थिए । उनीहरुले आफूले जानेका सबै उपाय प्रयोग गरेका थिए । तर सकेनन् ।
शुक्रवार जिल्ला अदालतका न्यायाधीश प्रेमप्रसाद न्यौपानेले आरोपी १६ जनैलाई पुर्पक्षामा पठाउने आदेश दिए । विचौलियाको भूमिका पूरा गरेका टंक गुरुङलाई भने अदालतले १० लाख र लक्ष्मी महर्जनलाई पाँच लाख रुपैयाँ धरौटीमा रिहा गर्ने आदेश दियो । उनीहरुले पनि सफाय भने पाएका छैनन् ।
नेपालीलाई नक्कली भुटानी शरणार्थी बनाएर अमेरिका पठाउने प्रकरणमा मुद्दा चलाइएका ३० जनामध्ये १२ जना अझै फरार रहेका छन् । अभियुक्तहरूविरुद्ध ठगी, सङ्गठित अपराध, लिखत किर्ते, राष्ट्रहित प्रतिकूलको कसुर र एकीकृत कसुर मुद्दामा नियमअनुसार कैदसहित २८ करोड ८१ लाख ७४ हजार पाँच सय रुपैयाँ बिगो भराउन पनि माग गरिएको छ ।
नक्कली भुटानी शरणार्थी प्रकरण मुद्दामा जिल्ला अदालत काठमाण्डौमा १२ दिनदेखि थुनछेकको बहस चलेको थियो ।
यो मुद्दामा सरकारी वकिलले पनि राम्रो भूमिका खेलेका छन् ।
छुटाउछु भन्दै मोटो रकम लिएर पनि जेल गएपछि आरोपीका आफन्तले बहस गर्ने अधिवक्ताको आलोचना गर्न थालेका छन् ।
