अनलाइन डबली
काठमाडौं । आसिफ शेख सन् २०२३ मा एकदिवसीय अन्तर्राष्ट्रियमा सर्वाधिक रन बनाउने ब्याट्सम्यानको सूचीमा दोस्रो स्थानमा उक्लिएका छन् । नेपालका विकेटकिपर शेखले ११ खेलमा ४१० रन बनाएका छन् । विश्वकप लिग– २ अन्तर्गत घरेलु मैदानमा जारी अन्तिम त्रिदेशीय एकदिवसीय अन्तर्राष्ट्रिय श्रृंखलामा आसिफले एक शतक र एक अर्धशतक बनाइसकेका छन् ।
भारतीय खेलाडी सुबमन जिल पछि विश्वमै शेख दोस्रो सूचीमा छन् । जिलले ६ खेलमा ५६७ रन जोडेका छन् । नेपालका शेखपछि तेस्रो स्थानमा इङ्ल्याण्डका जोस बटलर रहेका छन् । उनले ६ खेलमा ३७२ रन जोडेका छन् । त्यस्तै, चौथो र पाँचौं पनि नेपाली खेलाडी बनेका छन् । नेपालका कप्तान रोहित पौडेल ३४१ रनसहित चौथोमा छन् । ११ खेलमा ३११ रन जोडेका कुशल मल्ल सातौं र २८० रन बनाएका कुशल भुर्तेल १०औं स्थानमा छन् ।
आसिफले सोमबार पीएनजीविरुद्ध २१ बलमा अविजित ५३ रनको पाली खेले । एकदिवसीय अन्तर्राष्ट्रिय क्रिकेटमा आसिफले ३४ खेलमा एक हजार ७३ रन जोडेका छन् । एकदिवसीय अन्तर्राष्ट्रिय क्रिकेटमा उनी एक हजार रन कटाउने २ मध्ये एक नेपाली ब्याट्सम्यान हुन् । रोहितले पनि यो सफलता हात पारेका छन् ।
आसिफको नाममा एक शतक र एक अर्धशतक रहेको छ । विश्वकप लिग– २ मा आसिफ नेपालका लागि सर्वाधिक रन बनाउने ब्याट्सम्यान हुन् । उनले २९ खेलमा ९३४ रन बनाएका छन् । उनी सर्वाधिक रन बनाउने ब्याट्सम्यानको सूचीमा ११औं स्थानमा छन् । रोहितले ३२ खेलमा ८९३ रन बनाएका छन् ।
