अनलाइन डबली
काठमाडौं । समानुपातिक सांसदको अन्तिम सूची निर्वाचन आयोगमा पेस गर्ने आज अन्तिम दिन । आज दिउँसो ४ बजेभित्र पार्टीले पाएको संख्याका आधारमा सूची पठाउन आयोगले समय सीमा तोकेको थियो ।
मुख्या ठूला दल नेपाली काँग्रेस, नेकपा एमाले, नेकपा माओवादी केन्द्रले आज विहानबाट बैठक बोलाएका छन् । त्यसैगरी जसपा र राप्रपाले पनि बैठक बोलाएका छन् । आकांक्षी धेरै भएकाले नेताहरुलाई अन्तिम टुंगो लगाउन समस्या भएको छ तर पनि आज अन्तिम दिन भएकोले जसरी पनि टुंगो लगाउनुपर्ने बाध्यता भने छ ।
अहिलेसम्म जनमत र नागरिक उन्मुक्ति पार्टी र रास्वपाले भने समानुपातिक सांसदको सूची तयार पारिसकेका छन् ।
गत ४ मंसिरमा सम्पन्न प्रतिनिधिसभा र प्रदेशसभातर्फको समानुपातिक सिट बाँडफाँट अनुसार सबैभन्दा धेरै एमालेले १०४ पाएको छ । जसमध्ये ३४ प्रतिनिधिसभातर्फ हो भने बाँकी प्रदेशसभाको हो ।
दलहरुले पाएको मतको आधारमा आयोगले एमालेले प्रतिनिधिसभामा ३४ सांसद पाएको एमालेले प्रदेश १ मा १५, मधेश प्रदेशमा ८, बागमतीमा १४ गण्डकीमा १०, लुम्बिनीमा ११, कर्णालीमा ५ र सुदूरपश्चिममा ७ जना सांसद पाएको छ ।
नेपाली काँग्रेसले प्रतिनिधिसभामा ३२, प्रदेश १ मा १२, मधेश प्रदेशमा ९, बागमतीमा १२ गण्डकीमा ९, लुम्बिनीमा १०, कर्णालीमा ५ र सुदूरपश्चिममा ७ जना सांसद पाएको छ । नेकपा माओवादी केन्द्रले प्रतिनिधिसभामा १४, प्रदेश १ मा ४, मधेश प्रदेशमा ४, बागमतीमा ७, गण्डकीमा ३, लुम्बिनीमा ४, कर्णालीमा ५ र सुदूरपश्चिममा ३ जना सांसद पाएको छ ।
राप्रपाले प्रतिनिधिसभामा ७, प्रदेश १ मा ४, मधेस प्रदेशमा १, बागमतीमा ६, गण्डकीमा २, लुम्बिनीमा २, कर्णालीमा १ र सुदूरपश्चिममा १ जना सांसद पाएको छ । राष्ट्रिय स्वतन्त्र पार्टीले प्रतिनिधिसभामा मात्र १३ सिट पाएको छ ।
जनतम पार्टीले प्रतिनिधिसभामा ५ र प्रदेशसभा ९ सिट पाएको छ । प्रदेशसभामात्र सिट पाएका लोसपाले ३, नेपाल संघीय समाजवादीले १, नागरिक उन्मुक्ति पार्टीले ५, राष्ट्रिय जनमोर्चाले १, हाम्रो नेपाली पार्टीले १ सिट पाएको निर्वाचन आयोगले जनाएको छ ।
समानुपातिक सांसदको अन्तिम सूची तयार गर्न नेपाली कांग्रेसको केन्द्रीय कार्यसम्पादन समितिको बैठक आज बस्ने भएको छ । पार्टी कार्यालय सानेपामा दिउँसो १ बजे बैठक बोलाइएको पार्टी कार्यालयका मुख्य सचिव कृष्णप्रसाद पौडेलले जानकारी दिए ।
बैठकमा केन्द्रीय कार्यसम्पादन समितिका पदाधिकारी एवं सदस्यहरूको अनिवार्य उपस्थितिका लागि निर्देशन दिइएको छ । ४ मंसिरको निर्वाचन सम्पन्न भएपछि पहिलो पटक कांग्रेसको बैठक बस्न लागेको हो ।
त्यसैगरी नेकपा माओवादी केन्द्रको पदाधिकारी बैठक आज पनि बस्ने भएको छ । यसअघि हिजो बसेको पदाधिकारी बैठक समानुपातिक सांसदको अन्तिम सूचीबारे छलफल गरिको थियो । आजको बैठकबाट अन्तिम सूची निर्वाचन आयोगलाई बुझाउने नेताहरुले बताएका छन् ।
