काठमाडौँ । नेकपा (एकीकृत समाजवादी)ले विवादित अमेरिकी परियोजना मिलेनियम च्यालेन्ज कर्पोरेशन (एमसीसी) प्रतिनिधिसभा बैठकमा पेश गर्न दिने निर्णय गरेको छ । शनिबार बसेको एकीकृत समाजवादीको स्थायी समिति बैठकले संसदकाे अवराेध खुलेपछि एमसीसी टेबल गर्न दिने निर्णय गरेकाे छ ।
अब संसदमा अवराेध हटेपछि एकीकृत समाजवादीले सरकारलाई संसदमा पेश गर्न सहयाेग गर्ने भएकाे छ । तर नेकपा एमालेले संसदका अबराेध हटाउने कुनै संकेत छैन ।
यसअघि संशोधन विना संसदमा पेश गर्नु नहुने बताउँदै आएको एकीकृत समाजवादी आफ्नो अडानमा यथावत रहँदै यथास्थितिमा एमसीसी पास गर्न नसकिने निर्णय गरेकाे छ । संसदकाे अवराेध खुलेपछि एमसीसी संसदमा पेश गरेर बहस गर्न सकिने निष्कर्ष निकालेकाे छ ।
सडकमा एकीकृत समाजवादीका कार्यकर्ताहरुले यथास्थितिमा एमसीसी संसदमा लग्न नहुने बताउँदै प्रदर्शन गरिरहेका छन् । तर, पार्टीले संसदमा पेश गर्न दिने निर्णय गरेसँगै सडकमा ओर्लेका कार्यकर्ता अब के गर्छन् भन्ने सबैको चाँसो बनेको छ ।
